Minister di Enseñansa Irene Dick | Potrèt: Deya Mensche
WILLEMSTAD – Djaluna a publiká resultadonan di e reeksáminashon di skolnan sekundario, kual ta más alentador di loke anteriormente a antisipá.
Adishonalmente, minister di enseñansa, Irene Dick, a publiká un karta unda ta partisipá ku pa aña eskolar 2016/17 lo no sigui e designashon di Hulanda pa hasí e kriterianan di graduashon di HAVO i VWO mas skèrpi. Minister Dick su hustifikashon ta funda den e echo ku hulandes no ta lenga materno di hopi studiante, dunando esaki un bentaha lingwístiko riba esun kurasoleño.
Según DOS, e resultadonan di eksámen pa skolnan di VSBO tabata hopi bon. Na Juan Pablo Duarte i Amador Nita (VSBO) mas ku 75% a gradua i aproksimadamente 60% di alumnonan di Jacques Ferrandi VSBO a optené nan diploma.
Manchi Sille, kabes di skol di KAP, sigur ta kontentu ku e resultadonan, ya ku 50% di HAVO i 70% di VWO, a gradua. “E motivashon di muchanan ta hopi importante, i bou di e studiantenan di HAVO, esei por mas mihó”, ela atmití. Pero Lisette van Lamoen – Garmers, direktor general di RK Schoolbestuur ta preokupá ku e diploma kurasoleño di HAVO i VWO lo devaluá. “E echo ku nos no ta siguiendo Hulanda su medidanan, nos ta bai atrás tantu riba nivel hulandes komo esun internashonal, kual ta aseptá nos diploma pa motibu di nos vínkulo Hulandes”, van Lamoen – Garmers a splika.
Seis aña pasa, Hulanda a disidí di hisa e kriterianan pa obtene un diploma di HAVO i VWO pa su mes alumnonan, despues di a analisá dikon hopi studiante di HAVO i VWO ta ‘drop out’ durante nan estudio avansá. Espesialmente esnan fo’i Kòrsou ta aborta nan estudio na un nivel alarmante. E promé kriteria ta stipulá ku tur studiante mester obtene un mínimo di 5.50 pa inglés, hulandes i matemátika durante nan examen final, i tin mag di tin un 5 so, pa kualke di e tres materia. E di dos kriteria ku ta keda introdusí ta indiká ku un studiante no por gradua ku dos punto bou di 5.4.
Según minister Dick su karta, studiantenan ku ke sigui studia na Hulanda so mester kumpli ku e eksigensianan hulandes, pero e demas studiantenan ku ta kontinuá nan estudio den region, no mester kumpli ku e mes un eksigensianan. Konsekuensia di esaki ta ku e diploma kurasoleño no lo ta ekivalente mas na esun hulandes. Esaki a trese hopi konsternashon bou di mayornan i diferente direktiva eskolar, kende ta teme ku e diploma kurasoleño tan a peliger i e kriteria nobo lo perhudika e studiante kurasoleño inmensamente.
Según van Lamoen – Garmers, minister Dick a indiká ku a interpreta e karta robes, i ku no ta trata di dos diploma. Si van Lamoen – Garmers ta kere ku mester prepará promé ku introdusí kambio. “Nos no por tira afó loke nos tin, pasobra ta ku e futuro di bo pais bo ta hungando”, ela splika. “Aworakí nos tin un diploma ku ta outomátikamente ekivalente na esun hulandes. No ta outomátikamente nos ta haña un diploma ku ta keda rekonosé internashonalmente i nos por perhudika nos hóbennan di siña rònt mundu”, ela splika. Dos aña pasa ya kaba RK a introdusí e promé ahuste. “Nos ta bon prepara pa produsí studiantenan ku ta kualifiká na tur kriteria hulandes”, ela konkluí.
Mayan lo tin un reda di prensa un Minister Dick ta splika e detayenan kriterianan i nan konsekuensia pa nos hóbennan.
Outor: Deya Mensche