Still di un vidio ku a traha di e detenshon di Mitch Henriquez. For di su konosementu ta his’é pa hink’é den e bùs di polis
DEN HAAG – E frakshonnan di HSP, D66 i SP na Den Haag a reakshoná konmové riba e fayesementu di Mitch Henriquez. E arubano di 42 aña di edat a fayesé djadumingu despues ku djasabra polis a deten’é violentemente na un festival di muzik.
Alkalde di Den Haag Jozias van Aartsen a papia telefónikamente ku e bosero di famia Henriquez. Den e kombersashon el a kondoler e famia. Tambe e ta spera ku pronto lo bini klaridat tokante e manera ku kos a pasa den fayesementu di Henriquez.
Segun testigu polis a usa hopi violensia durante e detenshon i no a duna Henriquez kuido médiko ora ku a resultá ku físikamente e no tabata bon. Polis a deten’é pasobra e lo a grita ku e tin un arma. Pero e bishitante di festival no tabatin arma, asina Ministerio Públiko (OM) ta konfirmá. Rijksrecherche a kuminsá un investigashon.
Kultura di violensia
Haagse Stadspartij (HSP) a hasi pregunta por eskrito na direktiva di e siudat tokante fayesementu di Henriquez. Miembro di konseho Fatima Faid: “Nos ta tuma e kos aki hopi serio. Ta horibel, ku por yega asina leu i ku no a duna kuido médiko. Den Haag tin un pasado di violensia di polis ‘kontra koló’, por ehèmpel nos a yega di papia mas be tokante profilashon étniko. Berdaderamente ta trata di un kultura di violensia serka polis. Violensia di polis i rasismo ta un tópiko grandi.”
SP i D66 huntu a hasi pregunta por eskrito tokante morto di Henriquez. Nan ke sa entre otro si Henriquez a haña asistensia médiko adekuá ora el a bira malu. Aisha Akhiat (SP) ku ta un di esnan ku a hasi pregunta: “Nos ta komprondé ku kolegio di B & W no por bisa muchu aworakí, pero nos ke sa kon polis a aktua, pakiko, kiko e protokòl ta i pakiko no a hib’é e EHBO di mas serka.”
Akhiat: “Mi no ke papia di rasismo mésora. E palabra ei ta pasa hopi, pero aktualmente tin muchu inklaridat. Mi ta komprondé e pensamentu ku despues di insidentenan anterior esaki a kuminsá parse un patronchi, pero mi ta kouteloso ainda pa bisa esaki.” Den e añanan ku a pasa algun biaha polis di Den Haag a haña mal nòmber pa motibu di violensia eksesivo, ku tin be a kaba ku morto.
Segun Danielle Koster, presidente di frakshon lokal di CDA, no ta trata di un problema struktural serka polis. “Den Haag ta un siudat grandi kaminda hopi be polis mester aktua i asina tin be ta parse manera kos ta bai malu. Algun tempu pasá a sali un sine tambe di aktuashon di polis na Hoefkade. Despues a bin resultá ku e sine tabata konta un banda so di e historia. Ke men ta muchu trempan pa husga e kaso aki for di awor.
Outor Pieter Hofmann