Jaime Falconi, Val Peterson y Randolf Croes di PARA | Potrèt: Ariën Rasmijn
ORANJESTAD – Un grupo di ciudadanonan a forma un iniciativa bou nomber di ‘Pro Apertura Refineria Aruba’ (PARA). Meta di e grupo ta pa yega na inclusion di e ehecutivo petrolero Mericano Nelson English den e comision cu gobierno di Aruba ta formando pa sondea posibel reapertura di e refineria na San Nicolas.
Segun miembronan di PARA Val Peterson, Randolf Croes y Jaime Falconi, no ta asinna cu e refineria di Valero ta den asina mal estado cu e no por wordo habri mas. Prome cu a cera e facilidadnan dos aña pasa, Valero lo a haci renobacionnan extenso. Ademas e miembronan di PARA ta haya cu gobierno di Aruba ta comunicando mensahenan conflictivo pa loke ta nan intencionnan pa habri e refineria bek. Cu Nelson English den e comision pa busca operador nobo, lo tin mas oportunidad segun PARA, mirando experiencia y contactonan di e ehecutivo Mericano.
PARA ta argumenta cu tin cantidad di Arubiano trahando den exterior cu lo ta cla pa bin bek y traha na e refineria ya cu aparentemente di hopi e compromisonan di trabou na lugarnan manera Trinidad y Saudi Arabia ta den termina . Tambe tin companianan cu ta interesa den bira operador di e refineria. Lo tin interes for di Iran y for di e compania Ruso Rosneft.
E refineria di Valero na San Nicolas ta dos aña cera. E aña aki, segun acuerdo cu gobierno di Aruba, Valero lo bay tin cu bay desmantela e refineria y duna e tereno bek na gobierno di Aruba. Parlamento di Aruba a pidi Valero pa duna un tiki mas tempo pa lanta un un comision cu lo mester haci un ultimo intento pa busca un operador nobo.
Autor Ariën Rasmijn