Durante un reda di prensa di minister Dick, alumnonan a protesta na Fòrti riba e karta ku minister di enseñansa a skirbi | Potrèt: Deya Mensche
WILLEMSTAD – Ayera tardi tabatin un reda di prensa i un protesta di mayornan rabia riba e karta ku minister di enseñansa Irene Dick a saka pa minister hulandes Jet Bussemaker riba e kriterianan di eksámen ku mester bira más skèrpi.
Minister Dick a enfatisá ku Hulanda no a bin ku niun medida ainda, i ela a manda e karta simplemente pa start e kòmbersashon ku Hulanda. Giselle McWilliam, èks polítiko i mama preokupá, a reuní ku aproksimadamente 60 mayor i alumno na Fort Amsterdam, pa asina demanda aklarashon riba e akshon di minister i e konsekuensianan di e karta.
Deya Mensche a papia ku minister Dick
Komoshon
Minister Dick ta haña ku ta polítika a keda hungá ku e karta, kousando un komoshon sin nodi. Ainda no a haña kontesta ofisial bèk, pero durante e reda di prensa a bin dilanti ku ACW lo ta wardando riba e plan di Kòrsou sa pa kon ta introdusí e kriterianan en futuro. Niun momento so e karta a papia di dos diploma, i a enfatisá ku ta dos eksámen lo tin, pero un diploma.
Si e minister a indiká ku Kòrsou tambe mester hasí un análisis pa determina su nivel, i no por tumá over e regulashon di materia básiko hulandes sin pensa. Según minister Dick, Hulanda tin años ta partisipá na testnan standarisá internashonalmente pa determina su nivel, pero un motibu of otro nunka Antias ni Kòrsou no a keda inkluí. Riba e tereno lingwístiko, tambe mester tene kuenta ku e echo ku e studiante kurasoleño tin un desbentaha riba esun hulandes, kende ta keda instruí den su idioma materno. “Kòrsou ta haña hulandes obligatoriamente na sistema di lenga materno i no komo idioma strañero”, Dick a deklará.
Material di skol
Varios hóben ku tabata protesta a indiká ku e problemanan na kuminsamentu di aña ku material di skol definitivamente tabatin influensia riba e resultadonan i a papia di sifranan alarmante di muchanan ku a keda sinta of drùip e aña akí. Minister Dick no ta komprondé dikon esaki ta e kaso i ta haña ku direktivanan di skol mester asumí nan responsabilidat. Alumnonan ku a protesta na fòrti, na nan turno a indiká ku e aña akí nan no a haña varios buki. “Na Radulphus nos no a haña buki di físika ni informátika, i e sistema di stensel ta unu hopi impráktiko paso na final di aña, b’a pèrdè tur stensel. Si no ta pa nos dosentenan, nos no lo a optené bon punto pa e materianan akí”, Emil a splika. “Pa e aña eskolar nobo ya tur buki a keda ordena i ta rumbo pa Kòrsou”, minister a garantisá.
Inspekshon independiente
Minister Dick ta haña ku resultadonan di e aña akí por hopi mas mihó, pero ta alivia ku mayoria di e alumnonan a skor bon sin e kriterianan nobo. “imagina bo ku a introdusí e kriterianan, ta un matansa lo tabatin”, ela deklará. Tambe minister Dick ta pone komo promé responsabel pa kalidat di enseñansa na e ocho direktiva di skol. “Ministerio di Enseñansa tin su inspekshon independiente ku por kontrolá periódikamente, pero ami komo minister no por hasí nan trabou, i ta nan tin e funshonario nan ku por kontrolá tur ora”, ela agrega.
Outor: Deya Mensche