Mama i ruman muhé di Mitch ku un potrèt grandi di dje – | Potrèt: Sharina Henriquez
ORANJESTAD – Aruba ta preparando un marcha di silensio asina e kurpa di Mitch Henriquez (42) yega. E famia lo t’ei presente, asina su mama Maria (66) ta konta djis despues ku e notisia a yega ku su yu hòmber a stek muri durante su detenshon.
Ainda e famia no ke reakshoná riba e komportashon di polis. E palabrashon ta ku nan ke dera Mitch promé. Den Maria su sala tòg algun famia i amigu tin reakshon fuerte. Un prima ku a mira e vidionan no por komprondé pakiko mientras ku e tabata fo’i dje kaba a lastra Mitch hink’é den e bùs di polis ‘manera un saku di sushi’.
Hopi violensia
Mayoria di e famianan no ta kere ku por tabata un kaso di diskriminashon. Mas bien ku algun polis a usa muchu hopi violensia. Nan ta enfatisá ku tin polis ‘bon’ tambe. Ademas un di e polisnan ta un arubano.
Maria no a mira e vidionan ainda i e no ke mira nan tampoko. Loke si e ke ta pa mayornan ku tin yu ku ta studia na Hulanda òf ku tin ku bai Hulanda ainda, alertá nan yunan pa loke ku a pasa. E ta bisa ku e ta sinti su yu hòmber su falta mashá, ku for di su divorsio ta biba serka dje. Pa e famia ta importante tambe ku for di e tèst a sali ku Mitch no a usa droga ni bebe di mas.
Nan ke pa mundu mir’é manera nan konos’é: un hende ku tabata yuda su mama hopi i ku tabata trese bon ambiente. El a kria tres yu; dos di un relashon anterior di su èks kasa, i huntu nan a haña un yu hòmber 13 aña pasá. Mitch tabata na Hulanda tambe pasobra e yu muhé mayo ta serka di haña yu.
Mama Maria ku un potrèt di Mitch na mucha | Potrèt: Sharina Henriquez
Kompinchi
Arubahuis i munisipio di Den Haag ta paga e buelo i e entiero. Maria ta konta ku el a risibí un mail di alkalde tokante di esaki. Un amiga ta grita rabiá ku bon mirá Den Haag mester paga tur kos. Maria no ta reakshoná i djis un ratu despues ta mustra potrèt di Mitch den su hubentut, un mucha kabei blònt, i ta konta di su tata ku for di edat di 45 aña a fayesé di kanser. “Mitch tabata mi kompinchi. Di berdat, semper e tabata alegre”, su ruman muhé Germaine ta snek.
E intenshon ta pa e marcha silensioso sali di aeropuerto asina e kurpa di Mitch yega i sigui e kaminda largu pa e agensia funerario. Promé famia i amigunan na Den Haag ta bai mira si nan lo organisá un konmemorashon ainda.
Outor Sharina Henriquez