Shop stuart di CBV Nuka Cathalina | potrèt Deya Mensche
WILLEMSTAD – Awe e 142 trahadónan di klínika Taams ofisialmente ta sin tin trabou. Pa largu tempu ekspektativanan falsu a keda lanta bou di e trahadónan, unda a indiká ku lo a tene un ronda di solisitut pa e departamentu di rontgen i laboratorio. “Trahadónan ta hopi tristu i ta un bèrgwensa kiko gobièrnu a hasí ku e trahadónan”, Earl Esseboom èks direktor médiko di Taams a splika.
Te ku 25 di yüni ainda tabata reina rumornan ku hospital Advent lo a hasí un ronda di solisitut bou di e trahadónan. Pero ora sindikato CBV a komuniká via email ku direktora di Advent, Cenaida Panneflek, esaki a indiká ku Advent a opta pa bai den un otro direkshon i no tuma niun trahadó.
“Nunka nan no a sinta ku nos pa papia over di e situashon di e trahadónan”, Johnsel Diaoen, presidente di CBV a deklará. “Sra. Panneflek a indiká ku ta e edifisionan so Advent a kumpra i no e maneho di e klínika. Ora nan kaba ku nan organisashon interno, nan lo hasí un ronda di solisitut habri, unda tur hende por solisitá”, ela splika.
No ta konosé ki dia e ronda akí lo tuma lugá i mientras tantu e trahadónan lo ta sin trabou. Tampoko no ta konosí kiko lo ta e maneho di Advent lo ta pa e lokalidat i por lo pronto e portanan di e klínika lo keda sera.
Outor Deya Mensche