Errol Cova den kombersashon ku dosentenan – potrèt: Fundashon KPEK
WILLEMSTAD – “Duna lès na Kòrsou ta improvisashon. Ofishalmente bo tin un ‘programashon, tèst i klousura’. Eiden a determiná ki partinan mi mester duna punto pa nan. Mi no por hasi esaki pasobra mi no tin un klas adekuá pa duna lès aden i tin muchu poko material.” Esakinan ta palabranan di un di e hopi dosentenan ku mester mira kon e por bini kla ku e poko material ku e tin na su disposishon.
“Ta masha difísil, sigur awor ku tin enseñansa grátis. Por ehèmpel a bira hopi mas difísil pa sali keiru ku e alumnonan”, e dosente di deporte ta bisa. “Mayornan mester kontribuí mas. Tin mayor ku no por. Esei ta laf pa e muchanan ku na final no por partisipá.
Un dosente ingles ta sosten’é. “Komo dosente bo mester ta sufisiente kreativo pa duna lès atraktivamente ku poko rekurso.” E tambe a pasa den e transishon difísil pa enseñansa grátis. Tabatin hopi problema ku suministrashon di buki. Komo dosente bo no tabatin pèrmit tampoko pa saka hopi kopia, pasobra direktiva di skol tabata spar plaka riba esaki.
Enseñansa barata
“Enseñansa grátis tabata zona manera muzik pero e implementashon tabata fatal”, èks dosente Errol Cova ta bisa. Añanan largu e tabata pesidente di sindikato di enseñansa i awor e ta presidente di Fundashon Kalidat Profeshonal Edukashonal Kòrsou (KPEK), un organisashon ku ta traha ku hende di enseñansa na desaroyo di enseñansa na Kòrsou. “Naturalmente enseñansa mester ta aksesibel pa tur hende. A tradusí enseñansa grátis den buki i método pòrnada. Pero ensenansa mester ta bon tambe. Mi no ke enseñansa barata.”
Segun Cova outoridatnan muchu biaha ta kere ku maneho ta un seri di desishon ad hoc. “No ta planeá pa término largu, ku e konsekuensha ku e kos ta bai malu kada bes ku tin un kambio di minister i gabinete. Último kuater aña nos tabatin un rèkert di seis minister.”
Ademas Kòrsou konosé mas ku shete direktiva di skol kada un ku so propio maneho. “Mientrastantu ku no tin un maneho inkonfundibel ku gobièrnu ta formulá, esaki ta un opstákulo. E relashon entre gobièrnu i direktiva di skol a bira un wega di poder”, Cova ta bisa. “Esaki no ta na benefisio di enseñansa pasobra den práktika tin shete gobièrnu.”
Poder
Èks dosente Edward Melfor ta konfirmá esaki. E ta presidente di Bo Mes Forsa, un fundashon ku ta yuda mucha ku entre otro nan hùiswèrk. E ta traha den ramo di enseñansa tambe. E manera ku e direktivanan di skol a plama for di otro ta un problema. Pa falta di un maneho sentral kada direktiva di skol tin e espasio pa formulá hopi kos na nan mes manera. Esei ta masha difísil pa Inspekshon di Enseñansa chèk. Ta organisashonnan ehekutivo ku hopi poder.” E poder aki, segun Melfor, nan por a atraé pa motibu di e kambio di e ministernan di Enseñansa. “Si kada bes bo haña bo ku un maneho nobo bo dilanti, bo ta kuminsá traha bo mes maneho.”
Término largu
Segun Cova no ta mira dilanti niun ora. “Enbehesimentu di e kuerpo di dosente ta un problema grandi. Hopi bes alumnonan no ta haña un materia na skol pa algun luna pasobra simpelmente no tin un dosente. “Mi yu muhé a keda sin haña físika simannan largu pasbra un dosente a bai. Awor su klas ta atras i e aña di skol a kaba kaba”, tata Ricardo Martinus ta konfirmá. “Aña pasá tabatin e mésun problema ku biologia.”
Cova ta ripará durante su kombersashonnan ku dosentenan ku e frustrashon di mas grandi ta falta di un maneho inkonfundibel. “E dosente no tin hèrmènt. Kon bo por apliká teknologia nobo riba un alumno si bo no tin material? Nos mester adaptá na e alumno. Bo no mester alehá di nan mundu.
Outor Leoni Leidel-Schenk