Ombudsman nashonal Reinier van Zutphen
DEN HAAG – Ombudsman ta investigá sinku kaso na Kuerpo Públiko Boneiru (OLB). Ombudsman Reinier van Zutphen: “Nos a skohe sinku kaso pasobra nos ta haña ku ta dura muchu hopi. E reakshon ta tarda masha hopi.”
Kuater di e sinku kasonan ta trata di tereno i erfpacht. Dos di nan ta di for di añanan nobenta di siglo pasá. E di sinku kaso ta un dama a entam’é ku for di 2012 ta warda un pèrmit di sambuyá.
Mayoria biaha Ombudsman ta keda tuma kontakto te ora ku un reakshon drenta di e instansha di gobièrnu ku ta trata di dje. Van Zutphen: “Loke nos a hasi awor ta kue sinku kaso i skibi un rapòrt. Si ta posibel nos ta duna rekomendashon tambe tokante kon OLB mester reakshoná riba petishon.”
Kombersashon
Ombudsman no tin medida di preshon. “Mi no por manda deurwaarder i bis’é bai obligá Kuerpo Públiko pa siguí e rekomendashonnan. Loke sí mi por hasi ta drenta kombersashon ku esnan responsabel na Boneiru.”
Promé ku e notisia a plama Van Zutphen a tene kombersashonnan ku OLB. Mas lat den aña, despues ku e rapòrt sali, a planeá kombersashonnan adishonal. Ombudsman ta ferwagt ku OLB ta tuma e señal na serio. E rapòrtnan ta públiko i probabelmente lo sali despues di zomer.
Bùdjèt
Ombudsman a skibi Minister Ronald Plasterk (Asuntunan Interno i Relashonnan den Reino) tambe. Van Zutphen ke pa strukturalmente fondonan bini disponibel pa tantu Ombudsman komo Ombudsman di Mucha. E organisashon ta responsabel pa aserká gobièrnu di islanan BES, pero no tin bùdjèt struktural p’esaki.
Na Boneiru, Saba i Sint Eustatius siudadanonan ta entregá keho relativamente mas frekuente ku na Hulanda oropeo. No tin Ombudsman di Mucha.
Van Zutphen: “Te aworakí ta despues a wak ta kuantu algu a kosta, i a paga. Pero mi ke pa den e plakanan regular ku ta bai pa Ombudsman, tin un suma reservá delantá pa nos trabou den Área Karibense.”
Outor Pieter Hofmann