Mitch su yu hòmber ta konsolá e ruman muhé di mas jòn di su tata defuntu den santana – potrèt Sharina Henriquez
ORANJESTAD – “Tur polis envolví, no solamente esnan ku a bula riba Mitch, mester haña nan kastigu.”Asina prima Astrid Everon-Jacopucci ta bisa djis despues di e entiero di Mitch Henriquez djaweps. Ruman muhé mayo Lila aki un siman ta sali pa Hulanda pa bai regla asunta ku un abogado.
Mas o ménos 250 hende ta asistí na e misa den misa di Santa Anna. E seshon ta mas largu ku kustumber, despues di kasi dos ora di kondolensia e famianan di mas serka, entre nan Mitch su yunan, ruman muhénan i mama Maria ta bai despedí definitivamente promé ku sera e kaha.
Na e momento ei Maria ta bira malu. Tin trahadó di Krus Kòrá den misa, pasobra djarason anochi durante e kondolensianan den e kas mortuorio Maria tabatin mester di un ambulans. Ora djis despues e misa kuminsá e mester bai pafó i atrobe e ta haña kuido den un ambulans.
Un di e kargadónan di kaha i bon amigu di Mitch, Rolly – potrèt: Sharina Henriquez
E pader a dediká su predikashi espesialmente na hustisia. Ta importante pa Mitch haña esaki den e bida ‘normal’, “pero”, e ta bisa esnan presente: “na final ta trata di hustisia divino. Esei ta parti di nos fe: bo ta haña loke bo meresé. ‘Hustisia pa bida’.” Despues prima Astrid ta bisa ku e famia berdaderamente ke haña hustisia hurídiko pa asina ‘Hulanda lo kambia i esaki lo no sosodé nunka mas’.
Ora dera e kaha den e santana banda di e misa banda di mitar di sinku, mama Maria t’ei atrobe. E ta dal algus slá ku su man riba e kaha di metal i yorando e ta bisa: “i sea serka bo tata i welo”. Mitch su tata a muri di kanser na edat di 45 aña. Mitch Henriquez no a bira mas bieu ku 42 aña ora kasi dos siman pasá el a fayesé despues di un detenshon violente na un festival di muzik na Den Haag.
Outor Sharina Henriquez