Durante nan estudio e bekadonan ta deskubrí ku nan tin mas problema ku idioma hulandes ku nan a kere – potrèt Sarah Joosten
WILLEMSTAD – Pronto studiante di Kòrsou lo bai Hulanda komo bekado pa sigui studia einan. Hopi bes e studiantenan mester kustumá pasobra e kambio ta masha grandi. No solamente e klima sino e idioma i kultura tambe ta masha diferente.
“M’a yega Hulanda huntu ku hopi konosí. Esei tabata masha agradabel pa mi”, Eldrimar Torres ta bisa. For di aña pasá e ta studia na Sporthogeschool di Eindhoven. “Mi tabata konosé e kultura un tiki kaba. Pero tòg mi mester a kustumá hopi. Hende na Hulanda tin be por ta seku, nan no tin ni sikiera un sonrisa.”
“Idioma hulandes semper ta i ta keda un punto suak”, Torres ta bisa. Pero dia pa dia ta bai mas mihó”. Torres ta bisa ku su kurason ta na Kòrsou. “Mi tin masha gana di bai bèk ora mi kaba. E solo, e laman i mi mayornan t’ei. Ademas tin hopi nesedidat di dosente di gimnasia. Esei ta ideal.”
Limitá
Kelsey Prince ta muda pa Hulanda pronto. “Mi ta bai Hulanda i mi no ta bini bèk nunka mas. Mi no tin nodi di biba na Hulanda semper, Inglatera i Australia tambe ta parse mi bon, ma Kòrsou si a fada mi un poko. Mi ta bai studia periodismo i komo periodista riba e isla aki bo ta mashá limitá.”
Idioma hulandes lo bira un reto, Prince ta bisa. “Mi a yega di bai Hulanda un siman i m’a kere ku mi hulandes ta basta bon. Ma ora m’a yega ei a resultá ku nò. Den kada kombersashon mi tabata pensa ‘bo por a papia mas poko poko?’. Dankidjó na e skol kaminda mi ta bai studia bo por haña lès di hulandes èkstra. Di SSC (Stichting Studiefinanciering Curaçao) bo ta haña un tiki guia, pero esei ta espesialmente pa yuda bo buska un lugá di biba i un introdukshon di e siudat”
E nesesidat di guia èkstra Marieke Daemen tambe a ripará. Dos aña pasá el a lanta e kompania Curacoach. Un kompania di coach pa studiante kurasoleño ku ke guia èkstra pa tur kos ku nan ta dal den dje na Hulanda.
Ayudo
Mi ta ripará ku idioma hulandes ta un problema. Mayoria di e studiantenan ku m’a guia mester di ayudo ku nan tesina. Hopi be nan ta den nan último aña kaba i nan ta pega kompletamente”, Daemen ta bisa. “Sigur ku idioma, pero tambe pasobra na no ta komprondé sierto método. Na Hulanda ta ferwagt ku si bo no komprondé algu bo ta puntra. Mi ta ripará ku studiante di Kòrsou tin be ta haña esaki kandente i esaki ta sali den nan tesina. E kuenta di no pidi ayudo ta e problema di mas grandi.
Pa evitá esaki Hogeschool Rotterdam (HR) ta ofresé diferente workshop espesialmente pa studiante di e islanan. “Nos tambe ta ripará ku studiantenan ta haña fèrfelu pa pidi asistensia. Nan mester di hopi kurashi pa hasi esaki.”, asina Theo Vleeskens di HR ta bisa.”
“Ta laf ku e workshopnan ei tambe ta un manera di buska asistensia i fèrfelu pa e studiante pidi”, Vleeskens ta bisa. “Nos no por obligá nan di tuma e kurso i p’esei e partisipashon hopi bes no ta asina grandi manera nos a spera. Tòg nos ta haña hopi importante pa ofresé esaki. No ta asina ku e studiantenan no ta haña bon guia den nan propio pais. Pero ei nan ta limitá den e kosnan ku nan por regla pa e studiantenan.”
Outor Sarah Joosten