Habitantenan di Jan Thiel ta mira e bista aki tras di nan kas | potrèt: Dick Drayer
WILLEMSTAD – Habitantenan di e bario Bottelier ta prekupá pa e área di naturalesa tras di e stashon di Selikor na Koraal Specht. Ei ya pa poko tempu ta tira frishidèr, frizer, stof i microwave bieu. Tin di e aparatonan ei ta lèk likido venenoso ku ta drenta tera. E kompania ku sertifikashon ISO a traha un kaminda di tera tambe ku ta pasa dor di e tereno.
E área ku ta keda kantu di Bottelier te na e saliñanan yama Labadera den boka di pueblo i tabata pertenesé na e tereno di landhuis Labadera. Siglo pasá a usa un gran parti komo landfill pero mei mei di añanan nobenta a sera esaki.
Potrèt: Dick Drayer
Trùknan ta kore bai bini
E habitantenan tin miedu ku ta bai usa e landfill atrobe. “For di tres siman tin trùk chikí i grandi ta kore bai i bini i nan ta tira no solamente aparato doméstiko dañá sino tambe sushi”, un di nan ta bisa. “Segun mi tin negoshante ta drenta e tereno ku nan trùk pa bin buska piesa.”
Direktor di Selikor Wesley Kook ta ninga tiramentu di sushi pero ta atmití ku ta usa e parti kantu di e kaminda ku nan mes a traha pa pone e aparatonan grandi tanten. “Nos ta limpiando e luga, no ta tira nada einan. E tereno ta di nos, ta p’esei nos no tin mester di pèrmit pa warda kos tanten.”
Problema temporario
Segun e direktor di e kompania ku ta prosesá sushi niun hende no tin nodi di prekupá. “Nos tin un problema temporario. E kompania Antillean Scrap, ku ta bai ku e frizernan i frishidèrnan pa nos, ya tin algun siman sin paresé. Pero nos ta den kombersashon i un solushon ta serka”, Kook ta sigurá.
Segun Lloyd Narain di e organisashon di medio ambiente Amigu di Tera no ta pèrmití pa bolbe habri landfill bieu. E solushon temporario ku Selikor ta faboresé, segun e no por. “Poskuido di kaminda di tira sushi ku a será ta parti di e seramentu. Den e tipo di área aki ta trata di riesgonan higiéniko ku por daña medio ambiente, salubridat i seguridat.
Potrèt: Dick Drayer
Kòntròl
“No ta promé bes ku Selikor ta haña mal nòmber pasobra nan ta usa e área di nobo”, e ta bisa. Na 2012 e habitantenan di Bottelier tabata keha di muskita i djaka i holó di bestia morto. E tempu ei tambe tabatin tiramentu di sushi ilegal.”, Narain ta laga sa. Un protesta di bario e tempu ei a pone ku servisio di Medio Ambiente a intervení.
Mester kontrolá e kapanan ku ta tapa e luganan bieu di tira sushi regularmente segun Narain, ku garantia di algun aña. Mester kontrolá sushamentu di e awa den tera tambe i si pasa e normanan stipulá mester tuma medidanan adekuá. Segun Kook esaki ta sosodé tambe i ta p’esei nan mes a konstruí un kaminda: “Asina e outonan di mi inspektornan por yega serka.”
Outor Dick Drayer