Clark Abraham – potrèt: Pieter Hofmann
KRALENDIJK – Diputado Clark Abraham di bestuurscollege di Boneiru ta di akuero ku ombudsman ta tene un investigashon di Kuerpo Públiko Boneiru (OLB). E ombudsman ta investigá sinku kaso ku gobièrnu lokal ta tarda pa atendé.
Abraham: “Asina bestuurscollege tambe ke. Nos promé desishon tabata pa tene un evaluashon di e efektividat i integridat di e maneho di gobièrnu. Nos a hasi esaki mesora despues ku nos a kuminsá tres luna pasá komo bestuurscollege.”
“Nos ta duna bonbiní na e investigashon di ombudsman, pero esaki ta trata solamente un departamento spesífiko i e ta den forma di un lista di pregunta. E trayekto di reflekshon di OLB ta mas hanchu i mas profundo. Nos ke pasa den henter e maneho, di kumbre te na e takiyero, pasobra tin nesesidat di investigashon.”
Asuntunan kompliká
E asuntunan ku ombudsman ta investigá hopi bes ta mas kompliká ku nan ta parse, Abraham ta bisa. “Un ehèmpel: tabatin un tereno ku den añanan nobenta no tabata registrá korektamente na kadaster i asina a sosodé ku a pasa e tereno aki pa un otro hende, ku a traha un kas riba e tereno. A ofresé esnan ku a sufri daño di esaki un tereno alternativo, pero sin éksito. Mas despues e herederonan a pidi duna nan e tereno original bèk, lo ta bai bira hopi karu. Esaki nos ta tratando aktualmente.”
Pèrmit di sambuyá
Den e kaso di e pèrmit di sambuyá ku esun ku a pidi ta wardando for di aña 2012, segun e diputado eibou tin glas. Abraham: “Pa bo duna hende un pèrmit pa un skol di sambuyá ta meskos ku bo no a duna nan nada. For di dia di e Vestigingswet BES na 2011 no tin un moratorio riba dunamentu di un pèrmit pa skol di sambuyá. Ademas no a pensa riba e konsekuenshanan, pasobra ainda no tin un maneho alternativo pa e eksigenshanan di kalidat ku un skol di sambuyá mester kumpli kuné. Nos ta trah’ariba, pero mirando e falta di kapasidat esaki ta dura mas largu ku nos ke.”
Kumpli ku palabrashon
Bestuurscollege ke oumentá e kalidat i kapasidat di e maneho di amtenar, pero no tin e fondonan adekuá pa logra esaki. Abraham: “Nos tin 83 vakatura, si nos yena tur lo kosta nos 4.8 mion dòler kada aña. Pero segun e investigashon di Idee Versa nos ta haña 5.5 mion di ménos na supsidio liber. I esaki ta sin tene kuenta ku e fondonan èkstra ku a palabrá ku Reino pa mantenshon di nos infrastruktura i edifisionan di gobièrnu ku te awe nos no a haña. Ku défisit asina e kos ta bira penoso, i lástimamente e kliente ta sinti esaki.
Outor Pieter Hofmann