Trahadó di programa Fardy Lodowica (nmr) i presentadónan Patricia Gruber i Ricky Martinus tur djadumingu ta drenta studio pa alkansá mas tantu hóben antiano posibel ku nan programa di aktualidat – potrèt: John Samson
ROTTERDAM – E programa antiano ‘Djawoki’ ku na Hulanda ta transmití na Radio Brasa, ta hopi nesesario. Asina e trahadónan di e programa ta bisa. “E tópikonan sensitivo tokante nos islanan ta papia di nan na kas so, pero públikamente i na e mesun manera krítiko no dje lihe ei”, Fardy Lodowica (27) ta bisa.
Kasi un aña kaba ta transmití ‘Djawoki’ djadumingu atardi, espesialmente pa antiano ku ta studia òf a kaba di studia na Hulanda. Dos ora largu ta tene kombersashon krítiko den studio i ta toka muzik karibense alegre.
Media hulandes
Durante kada transmishon e presentadonan ta trata pa enfatisá relato positivo di komunidat antiano mas tantu posibel. E programa di radio ke trese algu kontrali na ‘media hulandes’, ku segun e boluntarionan semper ta ‘frame’ antiano negativamente. “Pero si un hende logra algu den mundu di deporte, mesora no ta un antiano mas. E ora ei ta Nederlander”, segun presentadó Patricia Gruber (24).
E presentadó ta haña ku e mester yuda drecha e imágen ku hóben antiano tin di nan mes. “Tin tantu kos bunita den kultura antiano ku no ta sali dilanti sufisientemente.”
E deseo pa produsí programa di radio segun e trahadónan parsialmente ta e resultdo di un kultura kaminda hende no ta riska di ta krítiko abiertamente., i parsialmente ta e resultado di e sistema di enseñansa na e islanan. E alumnonan di skol ta siña muchu tiki tokante nan propio identidat, kultura i historia. “Nos ke mira esaki kambia, ke men nos mes a tuma e inisiativa pa produsí un show ku ta trata diferente tópiko”, Lodowica ta bisa.
Lucha interior
Pa ta krítiko, bon mirá ta resultá di ta un lucha pa produkshon di ‘Djawoki’ mes. Pa miedu ku e tópikonan ta kai muchu pisa serka e oyentenan antiano, konsientemente no ta trata sierto tópiko ainda. “Pa nos ta un lucha interior: pa ta krítiko i pa kontribuí na un formashon di imágen positivo di antiano. Bo ke fraternisashon tambe, ke men nos mester bai ku e oyentenan i prepará nan pa loke ta bai bini”, Lodowica ta konta.
Meskos ta konta pa e wéspetnan ku nan ke invitá. “Nos tur sa kiko ta pasa ku hende ku ta muchu kontroversial tokante nos kultura. Tur porta ta sera.”
Tópiko mas grandi manera kon famianan ta trata ku un yu homoseksual, òf ki influensha religion tin den komunidat antiano mester deliberá den e lunanan ku ta bini, e trahadónan di programa ta haña. E ora ei e liña di telefon tambe ta habri i ta spera ku e oyentenan lo yama durante di e transmishonnan.
Outor John Samson