Modelo digital di loke e prome set di pintura di muraya na san Nicolas lo por bira – foto: AMP
ORANJESTAD — Un proyecto nobo di ‘street art’ lo mester bay yuda atrae turistanan pa area di San Nicolas. Na oktober proximo un prome serie di pinturanan grandi riba murayanan di refineria Valero ta bay wordo aplica.
E idea aki cu ta carga nomber di ‘Aruba Mural Projects’ ta pa asina pone mas enfasis riba e rol nobo di San Nicolas como capital cultural di Aruba.
Ariën Rasmijn den combersacion cu Robert Tromp, director artistico di ‘Aruba Mural Projects’
E prome serie di pintura lo bay wordo traha den colaboracion cu muchanan di scolnan na San Nicolas. AMP ta den proceso aworaki di busca no solamente artistanan local estableci, pero tambe personanan cu no necesariamente ta considera nan mes artista pero tin talento di pinta, pa asina cuminsa traha riba e proyecto cu nan.
Tambe lo bay traha hunto cu artistanan cu ya caba tin proyectonan andando den San Nicolas. No solamente ta pinta e murayanan di e refineria cu ta core den e districto, pero tambe ta bay embeyese edificionan y otro partinan di e espacio publico na San Nicolas.
Autor Ariën Rasmijn