Ayera atrobe a apsolvé Van Dorp den korte na Arnhem – potrèt: Pieter Hofmann
ARNHEM – Ministerio Públiko (OM) no ta aseptá e apsolushon di Mark van Dorp. E sospechoso di 44 aña ayera den apelashon a haña apsolushon pa e asesinato dòbel di Vivica Spong i nan yu ku no a nase Julian. OM ta rekurí na kasashon serka Korte Supremo, e korte di mas haltu di Hulanda.
Abogado Sidney Smeets, ku ta sostené e famianan di Vivica Spong ta laga sa ku e famia ta aliviá ku Korte Supremo lo bai wak e kaso. “Naturalmente alivio ta algu relativo pasobra e tristesa tokante e sentensia di ayera ta dominá i ta masha grandi. Pero tin poko alivio pasobra OM a bisa asina lihé: nos no ta aseptá esaki.”
Lo no trata e kaso di nobo riba kontenido. Sí Korte Supremo lo bai mira si a apliká tur regla hurídiko na un manera bon. Tambe ta bai mira si wes ta splika sufisientemente bon den su sentensia ta kon el a yega na e huisio aki.
Kousa di morto
Den algun punto Smeets no por ta di akuerdo ku e konklushonnan di e sentensia. Korte ta konkluí ku e ekspertonan no ta ekskluí un otro kousa di morto, i ku ta p’esei no a determiná ku ta un krimen. “En realidat nan ta bisa: nos no por ekskluí ku tin un otro kousa di morto. Pero un sientífiko semper lo bisa esaki”, segun Smeets. “Un di e ekspertonan ta bisa esaki enfátikamente: mi no por ekskluí nada nunka.”
E abogado di famia Spong ta konsiderá e deklarashonnan mentiroso di Van Dorp komo prueba riba nan mes. “Ke men tin prueba, sino bo no por yega na e konklushon ku aparentemente e deklarashonnan ta mentiroso.”
Anker importante
Segun Smeets no ta kuadra ku un motibu i un kousa di morto ku ta klaramente demostrabel ta ‘anker importante’ den kada kaso penal manera Korte ta pretendé. “Esaki no ta bèrdat, motibu no ta rekerí den kaso di asesinato òf homisidio”, Smeets ta haña. “Un kousa di morto tampoko no ta un eksigensha, pasobra nos konosé kaso kaminda no tin un kurpa morto. E ora ei un kousa di morto demostrabel tampoko no ta un eksigensha, pasobra bo no por prueba kousa di morto ora no tin kurpa morto.”
Prueba insufisiente
Dia 2 di yüli 2012 Vivica Spong ku tabatin ocho luna na estado a fayesé bou di sirkunstanshanan sospechoso den su kas. Su komprometido Mark van Dorp segun korte a kousa ku tabatin hopi sospecho kontra dje pasobra el a gaña tokante hechonan importante den e kaso. Pero segun Korte no tin sufisiente prueba forénsiko pa kondená Van Dorp.
Outor Pieter Hofmann