Alain Voight i Walid Samandar – potrèt: Deya Mensche
WILLEMSTAD – 2015 ta pinta di ta un tremendo aña pa e genero di EDM i músika Dance na Kòrsou. Aktualmente, músika elektróniko baliabel, mihó konosí komo EDM, ta ser konsiderá e genero ku ta kresiendo más rápido na mundu. Mirando e aumento di talento lokal i internashonal i e evolushon lukrativo di e género, e impakto ekonómiko pa Kòrsou ta signifikante.
Ofisina di Turismo tambe a tumá nota di e desaroyonan lukrativo i den pasado a partner ku diferente promotor. Según André Rojer, manager di merkadeo di CTB USA, e desaroyo ta algu hopi positivo pa e ‘brand’ di Kòrsou internashonalmente. “Si bo demostrá ku bo ta serio, CTB sigur lo sostené bo evento ku merkadeo i PR”, ela splika. “Lamentablemente nos no tin e fondonan pa partisipá ku montantenan kuantioso, manera por ehèmpel Aruba”, ela splika.
500 mil florin
Ta kálkula ku e presupuesto pa e di tipo di evento aki ta varia den algun mion florin. Ambos Alain Voight, propietario di Face Events i Walid Samandar, propietario di Amnesia Events, a kumisa hari. “Ta millonario boso ta kere ku nos ta?”, Alain a puntra. “No, e ora ei niun hende por saka nan sèn”, Walid a añadi. Finalmente nan a atmití ku e presupuesto anual di Amnesia ta laba rònt di 500 mil florin. “Pa e promotor haña un DJ di renombre bin presenta na Kòrsou, e mester tin un relashon personal ku e artista, sino nan ta dal bo preis mata”, Alain a splika. “Nos tin suerte ku hopi DJ hulandes tin un afinidat ku Kòrsou.”
Kon rendabel e festivalnan ta realmente, ta difísil pa determina, mirando e gastunan kuantioso i e realidat ku e hopi lokalidat no ta akapará mas ku sinku mil persona. Alain i Walid a atmití ku e éksito di e evento ta sinta den skohementu di un bon lokalidat i sigurá e aporte di partnernan stratégiko i sponsor. “E proseso ta unu kompliká”, Walid a splika. Rojer di CTB tambe ta puntra su mes kon sierto festivalnan ta sobrebibí. “Promé ku nos komprometé nos mes ku niun promotor, nos kièr mira e plan i aliniashon di artista”, Rojer a enfatisá.
Amnesia festival 2015 na Kòrsou – potrèt: Deya Mensche
Hobby
Sinembargo na yüni último, algu remarkabel a tuma lugá, unda Alain Voight a konvensé rumannan Samandar pa bend’e Amnesia Music Festival. “Semper mi a atmirá kon rumannan Samandar a enfoká riba establesimentu di e ‘brand’ i e eksperensiá ku e públiko tin durante e festival, i nunka dje tantu riba e artistanan”, Alain a splika. “Nunka tabata mi intenshon pa bende Amnesia, pero semper mi a hasí e fiesta i eventonan komo un hobby”, Walid a añadi. Pero e negoshi ku Walid i su famia ta manehá a kumisa eksigí mas atenshon. “Ora Alain i ami a kòmbersá na febrüari di e aña akí, ainda mi no tabata sigur i tabata difísil pa laga Amnesia bai,”, Walid a splika.
Amnesia Music Festival no ta e úniko evento di EDM na nos isla. Aña ta habri ku Su’Legria, sigui pa Cabana Beach Festival, organisá pa Face Events, den e lunanan mei i sèptèmber. Na aprel i òktober, Latin Village Festival ta tumá lugá na Landhuis Brievengat. Tur novèmber, Smash the House Festival, ta tumá lugá na Kokomo Beach, VaersenBay.
Destinashon regional
Según Alain, pa e industria di festival EDM i Dance sigui floresé na Kòrsou, mester bini un struktura klaro den organisamentu di evento pa kosnan kana menos improvisa. “Hopi hende ta balota e gastunan i ta sobrebalora e ganashi konsiderablemente”, Alain a splika. “Mi soño ta pa Kòrsou bira un destinashon regional”, Alain a finalisá.
Outor Deya Mensche