Te dia di awe, proyecto di Smart Community a keda na un borchi banda di caminda na Kibaima, unda e lo mester wordo construi. Foto: Ariën Rasmijn
ORANJESTAD — Gobierno tin tur intencion pa construi e proyecto di Smart Community Aruba. Locual ainda no ta concreto ta ki dia lo bay cuminsa construi, segun minister di Infrastructura Benny Sevinger.
E mandatario ta bisa cu e proyecto awo ta cla pa bay destaho, despues cu a firma un acuerdo entre fundacion di cas social FCCA y gobierno pa construccion di e casnan den e bario aki, cual ta cay bou responsabilidad di FCCA y construccion di caminda cual ta bou encargo di gobierno. Proyecto aki di un bario di 20 hogar na Kibaima, den cual lo bay experimenta cu materialnan y tecnologianan sostenibel, a keda para basta largo sin ningun comienso di construccion.
Ariën Rasmijn den entrevista cu minister Sevinger
Segun Sevinger esaki ta pasobra tin diferente partner, entre otro TNO di Hulanda, compania di telecomunicacion Setar y tambe companianan di utilidad y como tal a dura largo pa yega na un reparticion di responsabilidadnan entre tur esakinan. Loke por bay pone e proceso pa yega na construccion dura mas largo ainda ta e decision cu mester wordo tuma pa loke ta pa ki tipo di destaho lo bay scohe, asina e mandatario ta duna di conoce.
Unabes cu temporada di vakantie termina, lo bay sinta cu tur partidonan envolvi pa tuma decisionnan al respecto. Siman aki, corant Amigoe a publica cu e proyecto di Smart Community lo a wordo suspendi, a lo menos temporalmente, pa motibo di falta di financiamento. Sevinger di su banda ta insisti cu gobierno tin tur intencion di concretisa e proyecto aki, cual tabata un di e puntonan focal den e programa di gobernacion cu nan a presenta na 2013.
Autor Ariën Rasmijn