Minister Plasterk ta papia ku Ronald van Raak (SP) – potrèt: Jamila Baaziz
DEN HAAG – Parlamentario Ronald van Raak (SP) ke pa minister Ronald Plasterk (Relashonnan den Reino) trese klaridat tokante e skarsedat di awa na Saba. E habitantenan mester usa baki di awa pa nan awa di kranchi, loke ta bai bira un problema den tempu di sekura largu.
Na 2009 i 2013 marina a solushoná e problema ku entrega di un stòk di awa na granèl na e isla. Van Raak ke sa si e minister lo hasi esaki atrobe. “Awa ta un nesesidat primario di bida. Tur kos ta kuminsá ku esaki”, Van Raak ta bisa.
Sabanonan aktualmente ta paga entre 105 i 110 dòler pa entrega di awa, tin be asta mas.Tantu siudadano komo kompania ta pasa trabou pa paga e suma aki. Van Raak ta prekupá pa e posibel konsekuenshanan pa ekonomia sabano. “Lo ta teribel si kompanianan, òf un inisiativa spesial manera e tayer sosial, bai fayit, no ta bèrdè?.”
Solushon struktural
Van Raak ta boga pa un solushon struktural. Durante di skarsedat den pasado tambe a papia di esaki pero sin resultado. “Bia pasá lo a traha un plan pa un solushon struktural. Esaki no a sosodé.”
E miembro di SP tin algun medida ku e ke investigá. “Na promé lugá nos no mester gasta awa. Tambe nos mester wak si por re-usa awa. Aktualmente – segun e sabanonan ku mi a papia kuné – tin masha poko lugá kaminda ta fangu aw’e yobe i asina tur e awa ta kore bai laman. Además tin posibilidat pa usa awa di laman pa traha awa dushi. Esaki ta kompliká i karu, ma nos mester investigá e posibilidat si.”
Kapasidat pa warda
Saba no tin un kaminda grandi ku por warda awa pa asina oumentá e siguridat di awa. E parlamentario ke pa e isla haña kapasidat mas grandi di warda awa. “Tin temporada ku mester di mas awa manera den zomer, ora tin mas turista.”
Minister Plasterk tin tres siman pa kontestá e preguntanan den parlamento. Pero Van Raak ta spera ku e mandatario, mirando e situashon, lo tuma akshon mas lihé.
Outor Pieter Hofmann