Èks manager di Kia Charlene Oduber – potrèt: Jacqueline Geeve

Èks manager di Kia Charlene Oduber – potrèt: Jacqueline Geeve

ORANJESTAD – Ta kore masha lihé ku hende ku ke trata e korupshon den e Instituto Korekshonal Aruba (KIA). Lógiko, tin trahadó ku ta gana míles di florin pa luna ku merkansia ilegal den e prizòn.

Asina e detenido Johannes Span Ospino (35) ta skibi den un karta for di su sèl ku èkstra seguridat den KIA. Èks manager di KIA Charlene Oduber ta konfirmá su relato. “Nan tabata ofresé mi plaka pa mi sera mi boka.”

Un hende ku ke trata ku e korupshon, manera èks direktor Trudy Hassell ta ‘bad business’ tantu pa wardado di prezu komo detenido, asina Ospino ta splika. “Nos ta papia di sumana serio, tin be asta diesmil florin pa persona pa luna. E hendenan no tin gana pa un persona bin pone òrdu eiden.”

Guera
Luna pasá, na petishon di un komishon di investigashon independiente, minister di Hustisia Arthur Dowers a duna Hassell su retiro komo direktor di prizòn. E komishon a konkluí ku entre personal di KIA i Hassell a surgi ‘un situashon serio’. Span Ospino ta bisa ku el a mira e situashon aki desaroyá. “Nan a kuminsá un guera abiertamente kontra e Iron Lady aki. Mi a alert’é. E tabata forma un menasa kontra e korupshon den KIA pues e tabata kore riesgo.”

Span Ospino ta kondená na ocho aña den sèl pasobra e tabata lider di un organisashon kriminal. A pone Ospino na e Fasilidat ku Seguridat Ekstra (EBI) despues ku el a trata di hui. “Mi sa tur kos di korupshon. Promé ku mi a resulta na EBI mi tabatin tres telefon.” Segun Ospino telefon i droga ta importante pa e detenidonan. “Ta e úniko manera pa kombatí fèrfelamentu. Pasobra aki no tin nada, apsolutamente nada di hasi.”

Oduber tambe ta bisa ku a ‘sak’é’ for di KIA pasobra e ker a pone òrdu. “Tin asina tantu kontrabanda ta drenta KIA. Tin imagen tambe di esaki. Ta difísil pa trata e problema pasobra e hendenan tin miedu. No solamente e wardadonan di prezu i e trahadónan di seguridat sino tambe e trahadónan mas haltu den e organisashon.” Oduber mes a bira impopular pasobra e tabata sospechá ku tabatin hende ta traha den posishon ku nan no a siña p’e. “Mi ta kere ku e diplomanan tabata falsu pero asina mi a pidi un investigashon mi mester a bai.”

Kaos
Minister di Hustisia Arthur Dowers sa ku ta gana plaka ilegal den e prizòn. Mi mester suponé ku e hendenan ku ta kulpabel di esaki lo ta kontentu si KIA keda un kaos. Meskos mi por imaginá mi ku nan ta preferá di mira esnan ku ke trata di drecha e kos aki, bai. Pero mi no ta kere ku berdaderamente nan tin e poder pa logra esaki.” Dowers ke trata ku e korupshon si. “Si nos no ta kapas aworakí pa eradik’é òf evit’é, e lo sigui dura hopi.”

Outor Jacqueline Geeve