Jaime Donata – foto: Ariën Rasmijn
ORANJESTAD — Desde cu horcan Ivan a azota Aruba na 2004, ni pueblo di Aruba, ni departamentonan di ayudo a siña con pa prepara nan mes mihor pa un calamidad grandi. Esaki director di Oficina di Calamidad Jaime Donata ta duna di conoce.
Despues cu rabo di horcan Ivan a causa hopi daño entro otro den barionan di Playa Pabou y na Santa Cruz na 2004, a organisa entre otro un charla den e mesun barionan ey pa conscientisa habitantenan ariba con nan por yuda evita cu nan cas cay bou di awa. A pensa cu hopi habitante lo atende e reunionnan informativo aki, pero por ehempel na Playa Pabou apenas cinco hende a presenta segun Donata. E ta haya cu habitantenan no ta mira un problema te ora e presenta.
Ariën Rasmijn den combersacion cu Jaime Donata
Desde un par di aña tin un servicio di SMS na cual hendenan por abona pa haya informacion oficial na momento den caso di un calamidad. Apenas 450 ciudadano a aplica pa e servicio aki. Mirando cu e cantidad di hende trahando den servicionan emergencia no ta yega pa e cantidad di habitante, Donata ta haya cu ciudadanonan mester siña prepara pa por yuda nan mes prome. Asina nan por yuda nan bisiñanan tambe y duna servicionan di emergencia espacio pa atende cu casonan urgente.
Departamentonan
Tambe pa loke ta departamentonan, Donata ta constata cu falta iniciativa. "No sinta warda te ora Rampenbureau organisa un oefening multidisciplinario", e ta opina. Cada departamento mester train su hendenan y idealmente apunta un persona den nan organisacion pa ta esun encarga cu calamidad. Departamentonan mes ta keda responsabel pa loke ta estado di nan material y personal, y Oficina di Calamidad no tin e autoridad pa impone nada riba nan. Tempo di horcan Ivan, a depende hopi riba entre otro refineria pa uzo di pompnan pa saca awa. "Aworaki cu Valero ta cera, hopi di e pompnan ey no tey mas", segun Donata. E director di Oficina di Calamidad lo kier mira un of dos pomp di awa grandi extra wordo cumpra.
Emisora di calamidad
Un aspecto importante den e plan di calamidad ta e radioemisora di calamidad cu lo mester ta esun na unda gobierno ta duna informacion oficial durante un calamidad. Segun Donata, gobierno a declara inoficialmente cu Canal 90 ta e emisora di calamidad. Ludwig Jansen, hefe di departamento di asuntonan tecnico DTZ ta bisa cu Canal 90 a lo menos ta un di e emisoranan cu lo por cualifica pa esaki, mirando cu ambos su oficina y e antena ta facilmente acesibel. Pero e no sa si Canal 90 tin un propio generador pa si coriente bay. E ultimo rapport den cual ta inventarisa aspectonan aki pa tur e radioemisoranan na Aruba ta cuater aña bieuw, segun Jansen.
Leoncita Arends, propietaria di Canal 90, no tabata disponibel pa splica si su emisora ta completamente prepara pa e tarea di emisora di calamidad. Oficina di Calamidad ta trahando riba un sistema cu cual gobierno lo por interumpi transmision cerca cuater emisora pa asina manda mensahenan oficial. Un plan di calamidad nobo den cual mas tanto ta redefini cooperacion entre gobierno y departamentonan, ta cla y ta bay wordo presenta pronto na Conseho di Minister.
Autor Ariën Rasmijn