Lider di frakshon di AVP René Herde – potrèt di archivo: Ariën Rasmijn
ORANJESTAD – Si trahadó gana míles di florin èkstra pa luna na negoshi klandestino den prizòn esaki ta inakseptabel, René Herde, presidente di frakshon di AVP ta bisa. “Reseso òf laga, minister di Hustisia Arthur Dowers mester responsabilisá su mes.”
Lider di oposishon Evelyn Wever-Croes (MEP) tambe ta bisa ku e ta preparando su preguntanan na Staten pa motibu di e notisianan tokante negoshi ilegal den KIA. “Pero mi ta duda si nos lo haña kontesta. Pasobra no ta promé be ku nos ta trese abusu den prizòn dilanti.”
Merkado ilegal
Siman pasá e detenido Johannes Span Ospino i e èks miembro di maneho di prizòn Charlene Oduber a konta bieu di e merkado ilegal den prizòn. Un grupo di trahadó korupto tur luna lo ta gana míles di florin na benta ilegal di droga i telefon.
Dowers ta bisa ku e sa di e korupshon. Tambe e ta bisa ku e lo ke kambia algu na e situashon. “Si nos no hasi algu awor e situashon aki lo sigui dura largu.” Pero un plan pa trata no tin. Siman pasá èks direktor di prizòn Trudy Hassell, ku a anunsia ku e lo bai pasa un basora den e prizon, a haña su retiro pasobra e no tabata popular serka e trahadónan di KIA.
Polítikonan ta prekupá pa e situashon. No solamente ta inaseptabel ku hopi hende ta ganando plaka na un manera ilegal, pero tambe ta inaseptabel ku e seguridat di trahadónan di KIA, e detenidonan i na final henter komunidat, ta na peliger”, Herde ta bisa. “Mester tuma akshon. Nos ke sa di minister kiko e ta bai hasi. Si berdaderamente ta trata di míles di euro, aki no ta trata di un ko’i kèns sino dinegoshi serio.
Porkeria
Segun èks minister Rudy Croes, e tabata minister di 2001 te 2009, semper tabatin korupshon den prizòn. Pero asina ekstremo manera awor ta pinta e situashon, tin e prekupá. “Esaki ta inaseptabel. Aktualmente prizòn ta un porkeria.
Den su tempu Croes tabatin su trikinan pa duna un trahadó ménos chèns di forma un organisashon ilegal. “Ta importante ora bo tin grupo di trahadó ku ta traha warda pa kambia nan regularmente i inesperá. I no e tim so sino e hendenan den e tim tambe. Hende ku tur dia, aña ‘den aña ‘fo ta traha na e mésun departamentu ta haña muchu hopi chèns pa konspirá. T’asina e kos ei ta bai.”
Wever-Croes ta duda ku berdaderamente lo trata e ‘situashon inaseptabel’ den prizòn. “Asina skandal yega muchu serka di un mandatario, polítikonan i Ministerio Públiko ta wak otro banda. Ta esei ta e problema. Tin hopi ehèmpel di esaki. No ta pa hustifiká pero no ta straño tampoko ku amtenar ta partisipá na esaki. Pasobra nan ta haña ehèmpel malu i nan sa ku tòg lo no bini un investigashon.”
Segun Herde i Wever-Croes ya kaba ta formulando e preguntanan pa Staten. Den e promé siman despues di e reseso ku ta kaba dia 16 di ougùstùs lo pidi minister Dowers pa kontestá nan. “Aworakí no tin sentido pa hasi pregunta pasobra tur esnan envolví ta ku vakashon.”
Outor Jackeliene Geeve