Koredó di sprent Churandy Martina – potrèt: Pieter Hofmann
ARNHEM – Koredó di sprent Churandy Martina no ta masha prekupá pa su leshon. Ta mas un medida di prekoushon ku el a bai e kompleho deportivo Papendal, kaminda nos a traha un sita. “No ta masha kos, pero mi ke pa tur kos keda bon”, Martina ta konta ku su sonrisa grandi di semper.
Su hamstring ta poko steif. Den e último dies dianan e no a sprent tur ku tin ainda, e ta bisa. Martina: “Si un hende bisa ku e ta kore òf hasi deporte sin doló, mi ta kere ku e ta gaña. Mi no tin tantu doló ku mi no por move mas, pero e doló t’ei semper i e no ta kita. Pero mester ta doló bon si!”
E kañon di sprent a klasifiká kaba pa Kampeonatonan Mundial di Atletismo na Beijing (ougùstùs) i Weganan Olímpiko na Rio (otro aña), ke men e no tin nodi di tuma riesgo. “Si mi bai kore i no bai bon, mi ta bolbe haña mi ku tratamentu di leshon. Esei ta kosta mi henter un siman atrobe.”
Martina a eksperiensha mas molester di leshon e último añanan aki. E no ke sinti krekeché, na KM e ke yega maske ta final di 100 i di 200 meter. Bira i keda 100% fet, mas ku esaki e no tin nodi di hasi, segun e koredó di sprent. M’a hasi tur kos kaba for di e komienso aña pasá. Awor ta poko kos chikí falta, manera start i akselerashon. I perkurá pa finish mas mihó.”
Media
Na e último kareda te aworakí Martina a finish na di ocho lugá riba 100 meter di World Challenge. No tabata promé be ku media hulandes a enfatisá su desendensia kurasoleño i ta reservá e palabra ‘Nederlander’pa e bianan ku e kue resultado spektakular. Esaki ta molesti’é? “Ami ta keda e mesun Churandy, nasé na Kòrsou ku pasaporte hulandes.”
Martina: “Bo mes tambe sa ku no ta hustu. Ma mi no por yuda, e hendenan ei ta keda hasi meskos un otro bia. Si mi kore bon – final, medaya i tur kos – mi ta bira hulandes atrobe. Ami no ta keda tene kos negativo, mi no tin tempu.”
Weganan olímpiko
Otro aña tin weganan olímpiko na Rio de Janeiro, pa Martina ya ta di kuater bia kaba. E ora ei e koredó di sprent tin 32 aña di edat. “Justin Gaitlin ta dos aña mas bieu ku mi i e ta kore mas duru ku tur hende.” Edat ta trese eksperiensha tambe, Martina ta haña. “Bo konosé bo kurpa mas mihó, ke men bo sa kiko bo mester hasi i kiko nò. Bo mester kuida bo kurpa mas mihó si, pero esei ta normal.”
Martina ta ilushoná e Weganan. “Di tur manera mi ke para na start i yega serka di e kareda perfekto. Niun hende no ta haña esaki mésora. Maske bo kore un rèkert mundial i bo wak e bèk ainda bo ta mira un ke otro ku bo por a hasi diferente. Mi ke yega serka anto e ora ei mi ta kontentu, e resultado no ta importá mi.
Outor Pieter Hofmann