Foto: Ariën Rasmijn
ORANJESTAD — Departamento di Imigracion di aeropuerto Reina Beatrix ta manda turistanan Venezolano cu no tin placa cu nan of prueba cu nan ta keda na un hotel bek pa nan pais inmediatamente.
Segun hefe di departamento Gerald Vingal, ya na Venezuela e noticia ta coriendo cu no ta asina facil mas pa bin Aruba sin placa of un lugar valido pa keda. E ta bisa cu imigracion di aeropuerto ta riparando caba cu tin menos caso di bishitantenan cu ta yega Aruba sin placa cash of un prueba di boeking na un hotel.
Ariën Rasmijn den combersacion cu hefe di Departamento di Imigracion Gerald Vingal
Te hasta tin hende yamando for di Venezuela pa haya informacion riba e maneho pa nan no haya nan mes den e prome vuelo bek pa nan pais. A pesar di esaki, Vingal ta bisa cu Imigracion toch ta mandando alrededor di 15 hende bek cada dia.
En busca di dollar
No ta asina mas cu Venezolanonan ta bin cumpra cantidadnan grandi di articulonan manera papel di wc cu na nan pais nan no por haya mas. Vingal ta mustra riba un tendencia cu pa via di inflacion na Venezuela a cuminsa haya mas acogida atrobe. E ta splica cu desde algun siman Venezolanonan cu ta bin pa estadia cortico ta bin cu placa, pero ta cambia esaki pa dollar y wanta e cen aki pa hiba bek pa nan pais, na unda e valuta Mericano tin un balor hopi grandi riba mercado preto.
Cu e ganashi cu nan ta haci, e Venezolanonan aki por cumpra nan articulonan di prome necesidad riba nan mercado preto local. Ultimamente autoridadnan local ta topando cu gruponan di Venezolano pasando anochi den aire liber en bes di na un hotel. Segun Vingal, ora ta controla si en berdad nan tin cash ta haya dollar, pero e personanan aki ta prefera di keda sin gasta nada y hiba lo mas posibel bek.
Hopi di nan tambe ta cambia nan vuelo na ultimo momento pa bay bek Venezuela un of dos dia mas trempan, unabes cu nan haya dollar den nan posesion. Ora ta puntra si tin un motibo particular ta haya diferente excusa, manera por ehempel cu un yiu a bira malo. Vingal ta bisa cu na e aspecto ey su departamento no ta duna mucho atencion, y ta laga e turistanan aki pasa.
Posadanan
Poco siman pasa Red Caribense a publica riba e fenomeno di e asina yama posadanan, casnan cu hopi biaha na un manera improvisa a wordo comberti den hotelnan chikito. Segun Vingal, tin mas control awor cu e maneho nobo di ‘cero tolerancia’ riba estadia di turistanan Venezolano na e posadanan. Tin mas informacion, y departamentonan ta controlando e casnan aki mas riba entre otro siguridad pa cu candela.
Autor: Ariën Rasmijn