E refineria na San Nicolas – potrèt: Ariën Rasmijn
ORANJESTAD – Refineria Citgo, un empresa filial di e kompania di zeta di estado PDVSA, tin interes serio den e refineria na Aruba. Esaki promé minister Mike Eman ta konfirmá.
E promé minister ta bisa ku un posibel re-apertura di e refineria na San Nicolas ta trese kuné un dilema pa su gabinete; “Aruba ta bai pa un inyekshon rapido di entrada òf kisas pa un futuro mas duradero pa San Nicolas?”
Eman ta konta ku anteriormente e aña aki via e minister venesolano di Energia a drenta e notisia serka gobièrnu Arubano ku PDVSA lo ke tuma ofer e refineria na San Nicolas, ku a sera for di 2012. Un aserkamentu mas promé ku esei a pega pasobra e èks presidente Hugo Chavez tabata sinti malu. Awor a bin sali ku PDVSA ke ehekutá e kompra via su kompania filial merikano Citgo.
Konstrukshon
Despues di kombersashonnan entre minister di Energia Mike de Meza i e manehonan di Citgo na Houston siman pasá, a sali un karta pa Valero, doño di e refinerianan na San Nicolas. Na final ta nan mester sinta na mesa ku Citgo pa finalisá e transakshon. Segun Eman tin diferente konstrukshon ku ta posibel i e kaminda pa e tumamentu ofer ta largu ainda. Asina por pasa e refineria direktamente pa Citgo òf pa Pais Aruba, ku por ehèmpel na su turno ta lease e ku Citgo.
E prome paso pa un tumamentu ofer probablemente lo mester bira un Memorandum of Understanding. Djei lo investigá si e partido interesá berdaderamente ta un kumpradó adekuá pa e refineria. Segun Eman Citgo tin komo bentaha ku e ke refina zeta krudo, i ta spesífikamente p’esaki a konstruí e refineria na kuminsamentu di siglo pasá.
Deliberashon interno
Na final un re-apertura por sigui solamente ku un akuerdo di gobièrnu arubano. Prome minister Eman no ta yama e atenshon di Citgo negativo, pero e ta bisa ku si yega asina leu ku Citgopor tuma e refineria ofer di berdat, esaki lo bira un desishon difísil. Tin deliberashon interno tokante di esaki, segun e promé minister.
Ku e seramentu di e refineria na aña 2012 Pais Aruba a pèrdè un entrada anual di 200 mion florin den un tiru. Un gran parti di trahadó arubano mester a bandoná e isla. Eman ta bisa ku, ounke ku a apsorbé e pèrdida aki, un re-apertura di e refineria ta atraktivo sigur sigur. Di otro banda e ta bisa ku su gobièrnu ta mas pro un maneho bèrdè i duradero, algu ku segun e promé minister tambe ta duna e isla fama internashonal.
Eman ke pa San Nicolas bira un destinashon atraktivo pa turista tambe, algu ku anteriormente ku un refineria aktivo den besindario nunka no tabata posibel. Tin plannan pa un òf mas hotel na Seru Colorado, i esakinan posibelmente lo no apresiá bista riba un refineria aktivo, algu ku segun Eman mester tene kuenta kuné.
Duradero
Si re-apertura di e refineria bai huntu ku un maneho mas duradero i pasamentu pa Aruba di terenonan grandi ku awor no ta usa pa nada, e kontemplashon di un re-apertura lo ta mas fásil, Eman ta bisa.
Outor Ariën Rasmijn