SSC ta ofresé studiante sosten finansiero pa estudionan den region – potrèt: Elisa Koek
WILLEMSTAD – 117 studiante kurasoleño a skohe e aña aki pa studia den region. E motibunan ta espesialmente e idioma i e sintimentu di ta na kas. Banda di e sosten finansiero no tin masha sosten ainda pa e asina yamá ‘studiante di region’.
Arthur De Nobrega Texeira mes a buska tur informashon tokante su estudio di Medesina na Costa Rica. Tòg despues di a kaba di studia el a haña un desapuntashon inesperá. “Mi ker a bira patólogo, pero ta te ora m’a kaba di studia m’a haña sa ku komo yu di Kòrsou bo no por specialisá na Costa Rica. Mi soño a kibra na wèrki.
Stichting Studiefinanciering Curaçao(SSC) ta ofresé studiante sosten finansiero pa studia den region i na Canada: un beka básiko di $4800, un fiansa básiko di $7200, $2000 pa kuminsá kuné i si ta nesesario un fiansa adishonal di $3000 pa aña. Despues di e promé aña studiantenan mayoria bia tin un debe di $10.200 (sin beka) ku nan mester paga un interes di 4 porshento riba dje. SSC ta ofresé un programa di preparashon tambe pa entre otro siña manehá bùdjèt, falta di kas i miedu di faya. Otro preparashon ta e studiante mes tin ku hasi.
Kalifikashon
Gillian Balentina via SSC a bai studia na Canada. E no tabata konosé niun hende i nunka no a bishitá e pais. “Bo ta riba bo mes. Por ehèmpel pa skohe un universidat, ta bo mes mester hasié.” Balentina promé ku el a bai a investigá kua universidatnan tin akreditashon i a basa su eskoho riba esaki. “Awor numa mi ta deskubrí na unda mi diploma ta bálido: dankidjó ta kasi tur kaminda!”
Banda di Canada, Costa Rica i Colombia ta destinashon popular pa estudio. Argenies Bernadina ta studia na Costa Rica via SSC. El a skohe pa esaki pasobra e ta dominá spaño mihó ku hulandes i pasobra e pais tin hopi kos komun ku Kòrsou. “Mi tabatin un konosí na Costa Rica i asina mi tabata sa hopi kaba. Mi a investigá universidat i mi a wak kua di nan tabata manera Kòrsou.”
Bernadina ta den di dos aña di su estudio di Medesina i meskos ku Arthur De Nobrega Texeira e no por spesialisá na Costa Rica ora e kaba di studia pasobra e no ta residente. “Mi ke bira neurólogo, pero mi no tin un idea ainda unda mi ta bai sigui mi spesialisashon. Mi ta spera ku algu lo kambia i ku mi por hasié aki tòg.
Investigá
SSC for di kuater aña ta lantando un ret mas amplio pa e studiantenan den region. Nan tin kontakto ku universidatnan i a nombra studiante ku tei mas aña kaba komo mèntòr na Costa Rica. “E resultadonan di e studiantenan ta masha bon”, Margit Freitas, direktor di SSC ta bis a. “Pesei nos ta traha duru riba previshonnan pa studiamentu den region, pero ainda no ta meskos ku na Hulanda. E studiante mes tambe mester hasi investigashon.”
Debe
De Nobrega Texeira entretantu ta bèk na Kòrsou i e ta traha komo dòkter di kas. El a disidí di no sigui studia pa patólogo. “Mi tabatin un debe grandi pasobra mi a kuminsá un bida nobo na Costa Rica. Mi no ke kuminsá di nobo pasobra mi ke lanta un famia.”
Lo e no a skohe pa studia na Costa Rica si e tabata sa di antemano ku asina e mester a laga su soño bai. “Lo mi a skohe pa un lugá den region kaminda mi por a studia loke mi ke, pero lástimamente e informashon tokante studiamentu den region ta limitá. Ta te ora b’a bai kaba numa bo ta haña sa esaki.”
Outor Elisa Koek