Outo merikano bieu ainda ta un bista karakterístika riba kaya na Havana – potrèt: Anneke Polak
WILLEMSTAD/HAVANA – Un delegashon finansiero di Kòrsou ta haña un sorpresa agradabel di un resepshon abierto i simpátiko na Cuba. Nan ta traha na lantamentu di un taskforce ku ta bai mira ki papel Kòrsou por hunga den e área ekonómiko.
Despues di 54 aña awe a hisa bandera merikano na konsulado merikano na Havana. Minister John Kerry di Asuntunan Eksterior tabata presente na e okashon históriko aki ku mester trese progreso espesialmente den e área ekonómiko.
Konkurente
Kòrsou tambe mester ta presente, asina embahador di Reino na Cuba Norbert Braakhuis ta haña. “Aktualmente Cuba ta lantado for di soño. Ekonomia kubano awóraki tin un hèndikèp, pero e lo krese sigur. Esaki tin un impakto den henter Karibe. Un konkurente turístiko formal pa e islanan, pero tambe un merkado fantástiko si bo por koperá kuné.
Kuminsamentu di yüni un delegashon finansiero bou di guia di prome minister Ivar Asjes a bai Cuba kaminda asta promé minister a topa ku Raúl Castro. Anoushka Cova a bai huntu na nòmber di Curaçao Internashonal Financial Services Association (Cifa). “E kubanonan tabata masha abierto i kla. Nan a indiká mesora ku nan mester di nos pa por kontinuá internashonalmente.”
Interkambio di konosementu
Tambe Cova a tende di e kubanonan ku hopi pais ta mustra nan interes. “Vise presidente di Konseho di Minister di Cuba na novèmber ke un plan konkreto di e taskforce, pa asina bira kla riba kua terenonan nos por koperá. Pensa riba telekomunikashon, investment banking, teknologia. Spesífikamente a pidi nos konosementu, si nos por organisá seminar. Nos ta bai mira kua kompanianan lo ke hasi esaki, pasobra tòg ta un invershon si.”
Na embahada di Estados Unídos a tene un fiesta na okashon di drechamentu di e lasonan ku Merka – potrèt: Anneke Polak
Kamara di Komersio na Aruba entretantu a kaba di tin un mishon di komersio pa Cuba i ku bon resultado, segun Roxanne Wolff di KdK Aruba. 34 empresario a bai Havana ku nan. “Kompania di konstrukshon, telekomunikashon, consultancy, retail, kompania den sektor di turismo, e delegashon tabata masha grandi. Cuba por ta un riesgo pa Aruba pa loke ta turismo, ta pesei nos a bai mira kiko Cuba tin di ofresé i unda nos por reforsá otro. Algun empresario a firma MoU kaba.”
KVK na Aruba i Cuba a firma un akuerdo kaba segun Wolff. Embahador Braakhuis ta gaba esaki: “Bo mester t’ei na momentu ku e kos ta bai kuminsá, no ora e ta lora kaba, e ora ei bo ta lat.”
E interes di Kamara di Komersio di Kòrsou te ainda ta ménos. Billy Jonckheer di KdK: “Pa nos ta importante pa traha na merkadonan manera Colombia, Brazil, i Panama. Tin hopi kos ta sosodé den e region, komo kompania bo mes mester disidí kua merkado ta importante pa bo. Cuba ta un invershon sigur, pero mi no ta kere ku esaki lo bai rápidamente, mi ta spera den dos aña asina.”
Eksperiensha
Embahador Braakhuis ta spera ku Kòrsou lo organisá su mes mas bon i mas lihé posibel. “Ainda Cuba mester inventá hopi kos, pensa riba digitalisashon i informatisashon di e komunidat. Un sentro finansiero, pa menta algu. Pero den e área di turismo tambe: kon bo ta trata ku barku krusero. E eksperiensha aki nos islanan tin. Pa motibo di lasonan bieu di famia ademas tin un base natural pa aserká otro. No ta bon pa Cuba so, sino pa Kòrsou tambe.”
Outor Anneke Polak