Monseñor Luis Secco. Foto: Ariën Rasmijn
ORANJESTAD — Casonan na unda un miembro di clero ta wordo acusa di abuso di menor, obispado di Willemstad ta laga den man di Husticia. Monseñor Luis Secco ta duna di conoce den un entrevista cu Red Caribense cu – segun reglamento di misa catolico – obispado mes no ta haci investigacion.
Durante su bishita na Aruba ayera, e monseñor a reitera cu su obispado ta completamente disponibel pa coopera den cualkier investigacion y ta practica ‘cero tolerancia’ pa loke ta abuso di menor. Un declaracion anterior di su banda na prensa ‘no a sali bon’, segun Secco. Sinembargo e ta ripiti cu di su banda como obispo ‘no kier sconde nada’ y ta dispuesto pa acomoda cualkier proceso judicial.
Ariën Rasmijn den combersacion cu monseñor Secco
Bou di Secco su obispado tabatin casonan den cual a acusa un pastor of un maestro di un scol catolico. E monseñor ta bisa cu akinan el a coopera cu husticia civil y a tuma responsabilidad tambe. Pero si acaso tabata trata di un persona cu despues a muda pa otro pais, Secco ta bisa cu e no ta cay mas bou di su huridiccion y cu e como obispo no ta responsabel p’e mas.
Acusacionnan falso
Miembro di clero cu a wordo acusa pero despues a wordo declara inocente den corte di husticia, ta haya un di dos chens den misa. Secco ta conta di un caso na Aruba na unda un miembro di clero a haya sentencia na su fabor y cu a bin bek pa traha den misa, aunke si patras di cortina y cu menos responsabilidad pasobra e acusacion contra su persona a mark’e den comunidad.
Monseñor Secco tambe ta bisa cu tin casonan tambe na unda miembronan di clero ta wordo acusa falsamente, cu e proposito di chantagea placa for di nan. Sacerdotenan y otro miembronan di clero cu si ta haya castigo directamente for di misa ta esnan cu por ehempel ta haya nan mes den relacionnan homosexual cu otro adulto. Nan no mag duna sacramentonan y ta wordo considera como ‘retira, te ora cu nan haya ayudo psicologico of psiciatrico’, asina monseñor Secco ta duna di conoce.
Comision Koeijers
Na 2010 e obispo di Willemstad a pidi pordon publicamente pa abusonan sexual cometi pa miembronan di clero y a anuncia instalacion di un comicion special cu lo mester duna cuenta riba casonan. Esaki a bira e asina yama comision Koeijers. Na cuminsamento di aña aki, corant Hulandes De Gelderlander a publica cu e comision ta existi practicamente riba papel so.
Tambe Evangelische Omroep den su programa ‘Dit Is De Dag’ a presenta un documentario den cual miembronan di e comision a duna di conoce cu nan a faya den nan proposito, ya cu niun hende a bin raporta casonan di miembronan di clero cometiendo abuso sexual di menor. Secco a alega despues cu e programa a contene entrevistanan cune y su representante sin cu nan a duna permiso pa uza esakinan.
Autor Ariën Rasmijn