Instalashon di e pipa di awa kantu di Fort Bay Road – potrèt: Hazel Durand
THE BOTTOM – Gobièrnu insular di Saba a haña plaka di Hulanda pa instalá un pipa di awa di e haf Fort Bay, te na e kapital The Bottom.
Lo instalá e pipa di awa i e pòmpnan nesesario durante e trabounan di drechamentu di e kaminda di haf. E drechamentu di e kaminda probablemente ta kuminsá fin di e ña aki. E pipa di awa mester pòmp awa di bebe di e haf pa e baki di awa na The Bottom.
Kapasidat
Mester di mas kapasidat pa warda awa di bebe. Aktualmente e poblashon ta dependé di dos kompania di awa riba e isla. Via e pipa di awa nobo por warda mas awa den e baki di awa públiko. E ora ei sabanonan por kumpra awa serka gobièrnu ora e kompanianan di awa tin un retraso den produkshon di awa di bebe. Ta bai konstrui kuater baki públiko èkstra pa awa shinishi tambe, partí riba e isla.
Ainda no a establesé e gastunan. Trùk di awa ta kobra entre 105 i 110 dòler pa mil liter di awa. 60 dòler ta pa awa i e sobra ta pa entrega, dependé di e distansha. Mester di mas o ménos tres te kuater entrega pa suministra un kas di famia pa un luna i mei di sufisiente awa desaliná.
Supsidio di emergensia
Gobièrnu insular ke baha gastunan di awa i ke introdusí un supsidio di emergensia den tempu di sekura. E finansamentu ta bini di Hulanda, spesífikamente pa proyektonan di awa riba e isla. Lo introdusí e maneho aki dos siman. Pa kasnan di famia ku entrada abou tin fondo di ayudo spesial, ku por haña via ministerio di Asuntunan Sosial.
Outor Hazel Durand