Potrèt: Janita Monna
KRALENDIJK – For di e siman aki mas ku 5 mil buki ta dualu riba Boneiru. E bukinan a kuminsá nan biahe rondiadó di e skolnan básiko di e isla.
Muchanan di skol básiko Strea Briante (ántes Watapana) ta na Rincon ta para kanta riba plenchi di skol ora un trùk yen di buki yega. Ora habri e kahanan mes ora e muchanan ta bira blachi den e bukinan di prenchi lombrante i e bukinan pa e lesadónan chikitu mas avansá.
Kurioso
Lider di e skol Jubela Balentin ta entusiasma: “E manera so kaba ku e bukinan ta yega aki ta hasi e muchanan kurioso. Mésora nan ke mira, i únabes ku nan wak, hopi bia nan ta kuminsá lesa tambe.
E bukinan ta nobo. Un donashon di kasnan di publikashon hulandes, asina esun ku a tuma e inisiativo pa e proyekto, aktor i produktor di televishon Leo Dijkgraaf ta konta. For di kuminsamentu di e aña aki e ta biba na Boneiru. Dijkgraaf: “Na Hulanda nan a kustumbrá sinku aña kaba ku e bukinan rondiadó di mucha. Ei tanten tin mas ku un mion di buki ta dualu.”
Pasa
E idea ta ku e muchanan no ta keda ku e bukinan, sino ta laga otro mucha tambe gosa di nan. Únabes ku nan kaba di lesa e buki por pas’é pa un amiguito òf amiguita, lag’e den brifenbùs serka un bisiña òf pon’é den supermerkado mei mei den e bèrduranan.
E muchanan di Strea Briante na skol ta pasa sigur mei ora pa dia ta lesa. Banda di esaki ta lesa duru den klas tambe Balentin ta konta. “Esei nos ta hasi espesialmente na papiamentu pasobra ta esei mayoria di e muchanan na e skol aki ta papia.” E echo ku no tin buki di dualu na papiamentu e ta haña lástima.
Dijkgraaf ta di akuerdo kuné: “Tur e bukinan ta na hulandes. Ku esaki mi no ke bisa manera un pastor: ‘Awor boso tur mester lesa hulandes.’ Ta espesialmente pa duna nan kurashi.”
Potrèt Janita Monna
Kuater idioma
Alfredo Koolman, direktor di Kompania di Awa i Energia Boneiru, ku aktivamente ta sostené e akshon di buki ku ta dualu i ku a pèrkurá pa e transportashon di e bukinan pa e skolnan, ta kompletá: ‘Lo ta bon si por a bini bukinan rondiadó di mucha na e kuater idiomanan di e isla. Pasobra e muchanan boneriano masha fásil por suich di papiamentu pa ingles, di hulandes pa spañó, esei ta ekstraordinario. Ku e proyekto aki nos ta spera espesialmente di promové lesamentu. Aki e kos ei no ta bai di mes.”
Un alumno di skol básiko San Luis Bertran, tambe na Rincon, ta wak den un buki di Mega Mindy. Na skol sí e ta lesa hopi, pero na kas no masha, e ta bisa tímidamente. Lider kordinadó Juf Tica: “Mucha ta lesa solamente si e hende grandinan duna e bon ehèmpel. Si nan no lesa na kas e muchanan tampoko no ta bai lesa.”
Biblioteka
E bukinan ta masha bonbiní na nos skol, e ta bisa. “Nos ke stimulá mucha pa lesa, pero tin tiki buki, espesialmente na papiamentu. Antes ainda Rincon tabatin un sukursal di biblioteka, awor ta na Playa so por fia buki.”
Ora direktora Patricia Angela di Kolegio Papa Kornes mas lat den meinta risibí e bukinan e ta bisa hariendo: “Ta tentadó pa pone nan den biblioteka di skol i mi ta puntra mi mes si aworó e muchanan lo ke pasa nan pa otro. Pero nos ta laga nan dualu. Si ta nesesario nan ta lesa e buki kuater sinku bes i djei numa pas’e pa nan amiguitonan.”
Outor Janita Monna