Siegmond van Lamoen di I-Animal – potrèt: Dick Drayer

Siegmond van Lamoen di I-Animal – potrèt: Dick Drayer

WILLEMSTAD – E fundashon I-Animal ke kastra kacho na Kòrsou kímikamente ku un medisina ku no ta rekonosé. E efektonan sekundario di e remedi no ta konosí i segun organisashonnan di animal na Estádos Unídos mester mira e uso komo eksperimental.

E Plan Pa Prevenshon Di Kacho di I-Animal ke kastra 10 mil kachó kímikamente pa 10 dòler pa kacho. Pa e plaka aki ta castra e cacho, e ta haña un chep i un banchi rekonosibel.

Pa esaki e fundashon a busku fondonan via crowdfunding pero no a logra su meta di 100 mil dòler merikano. Riba promé di ougùstùs e konteo a keda pegá na algu mas ku 4600 dòler. Awor I-Animal ta bisa ku e ta den kombersashon ku kompanianan ku ke duna un gran parti di e plaka ku ta falta.

Kontroversial
Siegmond van Lamoen di I-Animal ta bisa ku e prosedura ta ménos radikal pa un kacho i ta trese ménos riesgo pasobra no ta usa narkósis total. Ademas e ta spar tempu, e ta menos trabou i e ta hopi mas barata ku e métodonan tradishonal di sterilisashon.

“Loke e no ta bisa ta ku e remedi ku mester usa pa e kastrashon, calciumchloride a base di ethanol, ta kontroversial rònt mundu” veterinario Lyndon Comenencia ta bisa. “Pa duna e remedi ta doloroso. Ademas no tin prueba ku e ta efektivo i e remedi ta den un fase di desaroyo eksperimental Estudionan ku I-Animal ta referí na dje, mes ta bisa ku e efektividat ta un aña so. Ke men aki un aña mester crowdfund atrobe?”

Kolega veterinario Pieter de Geus, ku si ta sostené e proyekto, ta rekonosé ku e remedi no ta bon pa kacho ku tin doño. E ta bisa ku e doló ora duna e remedi ta asina fuerte ku ta kasi inevitabel pa duna narkósis total serka bestia di kas. “Pa kacho di kaya mi ta hañ’é aseptabel. E problema ei, kacho lòs riba kaya, no por solushon’é un otro manera.”

Veterinario
Durante un rueda di prensa I-Animal a introdusí algun nòmber di veterinario ku ta sostené e proyekto. Comenencia su nòmber tambe t’aden. “Mi a papia ku Van Lamoen si, pero nunka mi no a dun’é pèrmit p’esaki.” Ta menshoná ofisina di veterinario di Ronde Klip tambe, pero veterinario Margot Hack ta bisa ku nunka no a aserk’é.

A aserká klínika di bestia Parera si, pero e dòkter di warda Martis ta bisa ku su klínika lo partisipá ora ku I-Animal kontestá nan preguntanan. “Nos no a tende nada ainda di nan.” Martis tambe ta bisa ku e intervenshon por ta masha doloroso i ku e lo ke mira e estudionan ku ta bisa algu otro promé.

Tantu veterinario Martis komo Comenencia ta habrí pa ideanan pa trata e problema di kacho na Kòrsou. Pero nan tur dos seriamente ta duda e uso di calciumchloride. E estudio italiano di Dr. Leoci, ku I-Animal ta sita pa duna e proyekto un ‘go’ ta papia di un porsentahe di éksito di 80. “Kon I-Animal por sa ku siguransa kua bestianan di berdat a keda infértil despues di 12 luna?”

Zeuterin
Comenencia ta puntra su mes pakiko I-Animal no ta ehekutá e proyekto ku e remedi eksistente i rekonosé Zeuterin. “E remedi ta mas karu si, pero nos sa kon e ta traha. Ta ken tin un interes finansiero si keda mantené ku ta usa e remedi eksperimental aki? Asina Kòrsou ta bira un pruftùin pa klup chiki ku ta bisa ku nan tin e mihó interes pa animal na pechu. Ami si no ta masha sigur di esaki.”

Van Lamoen ke kuminsá ku e proyekto otro luna kaba. “Si resultá ku tin resistensia riba e isla pa usa calciumchloride, mi ta dispuesto na buska otro solushon.”

Outor Dick Drayer