Un boluntario ta duna e burikunan di Donkey Nursery kuminda – potrèt: Save Statia’s Donkeys
ORANJESTAD – E sekura kontinuo no solamente ta kousa problema pa habitantenan di Sint Eustatius, e burikunan riba e isla tambe ta sufri di falta di awa i kuminda. Poko tempu pasa tres animal a muri di hamber i sed den e tereno di yerba di gobièrnu.
“For di 2013 ora ku binti buriku a muri, mi a bisa gobièrnu ku mester traha plan”, Laurens Duiveman ta bisa. Segun e bosero di GreenFound i Donkey Nursery Sint Eustatius e èks diputado Carlyle Tearr “nunka no a hasi nada, i e èks kabes di LVV tampoko. “ E kontaktonan ku e manager aktual sí ta bon, Duiveman ta bisa.
Na 2013 e sirkunstanshanan miserabel bou di kua a duna akohida na 60 pa 70 buriku a kousa ku Partij voor de Dieren i D66 a hasi pregunta den Kamer.Gobièrnu insular i e departamentu di Agrikultura, Krio di Bestia i Piskeria (LVV) a primintí pa drecha e asuntu, pero e tempu ei kaba Greenfound Foundation ku a kai na pena di e animalnan neglishá, tabata masha krítiko tokante e kuido defisiente di e burikunan.
Molèster
E molèster ku e bestianan ku ta kana lòs ta kousa – banda di buriku tin baka i kabritu tambe – tin añanan ta molestiá gobièrnu kaba. Gobièrnu insular a tuma akshon na 2012. A kapturá mayoria di e burikunan ku ta kana lòs, a kastra nan i sera nan riba un tereno.
Gobièrnu tin plan pa usa un parti di e burikunan den turismo i ke regalá algun bestia na organisashonnan tambe. Pa motibu di e gastunan haltu di importashon di kuminda pa bestia lo rekategorisá terenonan i planta nan ku diferente tipo di yerba i mata pa drecha e dieta di e burikunan, asina LVV a laga sa na un enkuentro di informashon pa kampesino.
Hopi nesesidat
Den koperashon ku un organisashon merikano ta traha plan pa instalá un Donkey Nursery na Statia i pa produsi kuminda di bestia lokalmente hasiendo uso di hidrokultura. E akohida di buriku aktual tin falta di boluntario i di moda i ta bisa ku nan tin hopi nesesidat di sosten di gobièrnu.
Aktualmente 56 buriku ta haña akohida serka gobièrnu i 25 den The Nursery. Segun Duiveman e problemanan a kuminsá ora kuminsamentu di e aña aki a para e proyekto di bestia sin doño pa motibu di falta di plaka. “Tabatin un persona so na LVV pa duna e bestianan kuminda. Mi no ta kere ku e bestianan tabata haña sufisiente yerba kòrtá tur dia. Tampoko no tabatin plaka reservá pa kumpra kuminda di bestia.”
Solushon duradero
E problemanan a bira mas i mas grandi ora dia 10 di yüni Saba a kai bou di supervishon finansiero i a minimalisá e fondonan pa e sektor agráriko riba e isla. “Nos ta komprondé ku aktualmente tin supervishon finansiero i ku e representante di Reino mester aprobá tur gastu… pero mester usa tur medida pa kuida e burikunan”, e grupo “Save Statia’s Donkeys” ta haña.
“Nos ta spera ku nos ta haña ayudo ku skibimentu di un businessplan pa un solushon duradero. E plan aki ta nesesario pa haña finansamentu di DierenLot, Stichting Waardig Dier, i Donkey Sanctuary UK pa por lanta un Donkey Nursery permanente pa tur buriku na Statia. For di tempu ku e burikunan no ta útil mas a lubidá i neglishá nan.”
Outor John Kerkhof