Gofrie van Lieshout -

Gofrie van Lieshout – potrèt: Deya Mensche

WILLEMSTAD – Pa 1 di Òktober 2015, e Sentro pa Konosementu, Edukashon i Formashon Profesional di Industria Kòrsou, mihó konosí komo KBB lo sera su porta. Na yüli, gobièrnu a disidí pa no aparta fondonan riba su presupuesto pa KBB mas, i hopi biaha gobièrnu no tabata paga e resibunan na ora. “Nos ta papiando di anualmente solamente 600.000 florin pa un servisio sumamente balioso”, Gofrie van Lieshout a splika.

KBB a keda funda na 2008, ku apoyo finansiero di e Inisiativa Ekonómiko Sosial (SEI). Despues di tres aña komo proyekto piloto, e intenshon tabata pa gobièrnu subsidia e fundashon. Según e wepsait di KBB, esaki ta kontribuí na una mihó adekuashon entre e demanda di merkado laboral i e oferta di formashon profesional i tambe ta promové e desaroyo profeshonal i personal di e trahadó.

Inisialmente KBB tabata un konsepto deskonosí ku mester a gana konfiansa di e ministerionan di gobièrnu i merkado laboral. “Nunka KBB tabata den kompetensia ku niun instansia of ministerio”, van Lieshout a splika.

E problema di mas grandi ku KBB a konstatá den kurso di añanan, ku gobièrnu no tabatin un maneho integral pa ku enseñansa vokashonal, i esaki tin efekto riba desempleo i últimamente nos ekonomia. “Nos lo tabata mas eksitoso si esaki tabata e kaso”, van Lieshout splika. “Mi punto no ta ku KBB mester keda eksistí, pero mester tin kontinuidat sí. No por ta ku tur hende ta keda opera riba nan mes, i awó mester invertí den otro instansia, mientras tantu ku e konosementu i ekspertisio tabata eksistente”, van Lieshout konkluí.

“Mi a karga un speransa falsu ku tur kos lo keda resolvé, ya ku promé minister Asjes a sigurá mi esaki aña pasa”, van Lieshout a añadi. “No ta e kalidat di KBB su servisio tabata un kestion, pero a indiká ku ta falta di presupuesto ta e motibu”, ela splika. Riba e pregunta si polítika a hunga un rol, i si a resistí KBB pasobra e ta un inisiativa hulandes, van Lieshout no por a kontesta esaki. “M’a keda hopi desapunta ku gobièrnu no a mira e balor di e sentro di konosementu. Mi ta haña ku e temanan ku KBB tabata trata semper mester keda riba polítika”, ela añadi.

E instansia ku lo tumá over mayoria di e projektonan di KBB ta Plataforma Nashonal pa Desaroyo di Hubentut, kual a ser kreá for di Dialogo Nashonal ku gobièrnu a inisiá. Daniel Corsen Jr. i Elly Hellings ta e koordinádornan di e plataforma di Desaroyo pa Hubentut, kual ta operashonal fo’i aprel di e aña akí. “Ku establesimentu di e plataforma di desaroyo di hubentut, awó si lo tin struktura integral”, Corsen Jr. a splika. “KBB su aktividatnan ta sumamente importante, i a keda inkluí den nos plan di akshon”.

Plataforma ta konsistí di Ministerio di Enseñansa, Ministerio di Hustisia, Ministerio di Asuntunan General, Ministerio di Salu, Medio Ambiente, i Naturalesa, SOAW, VBC, KvK, sindikatonan, konseho di iglesianan, Bos di hubentut, FAJ, i Jeugd Centrale Curaçao. Aki dos luna Corsen Jr. i Hellings mester entrega un propuesta riba e projektonan di KBB.

“Porta tabata reina un persepshon ku KBB tabatin sèn, i si un ministerio kai afó of keda sin paga na tempu, esaki no lo tabatin un efekto devastador riba KBB”, Corsen Jr. a splika. Según Hellings, mester kontinuá ku e aktividatnan di KBB, pero hasi nan más finansieramente faktibel. “Loke nos lo hasi diferente ora ta garantisá presupuesto pa e programa di akshon, ta ku den kada ministerio lo destina sèn riba nan presupuesto pa e respektivo proyekto”, Corsen Jr. a splika.

“Nos a identifiká 40 indikador ku ta midi e desaroyo di hubentut, i tur aña lo midi esaki, Hellings a splika. Aki 4 siman e sekretariado di e plataforma pa Desaroyo di Hubentut i mientras tantu Van Lieshout i su tim ta buskando otro kos di hasi.

Outor Deya Mensche