Hòmber antiano i arubano mas tantu ta víktima di asesinato na Hulanda, a sali for di análisis di sifra di CBS di último sinku aña – potrèt: Nederlands Forensisch Instituut
DEN HAAG – Representantenan di komunidat antiano na Hulanda ta hopi prekupá pa motibu di un publikashon resien di Centraal Bureau voor Statistiek: Ta asesiná hòmber antiano i arubano kasi diestres bia mas tantu ku hòmber hulandes outóktono, a sali for di un análisis di último sinku aña.
E kantidat haltu di asesinato bou di hulandes di desendensia antiano i arubano lo ta relatá direktamente ku negoshi di droga i petishon di droga na Hulanda, asina Glenn Helberg di Overlegorgaan Caribische Nederlanders (OCaN) ta bisa. Kiko e resultadonan di investigashon di CBS bou di antiano i arubano ta mustra realmente? “Tin masha aña kaba ku mi no sa kiko e sifranan aki ta bisa”, Helberg ta bisa.
“Loke mi sa ta ku den e kabesnan di polítikonan e sifranan aki ta pone alarma zona i djei nan ta bin papia nan kosnan wapu”, Helberg ta bisa. “E miedu t’ei ku polítiko na Hulanda lo usa i malusá e estadístikanan pa ganashi polítiko, na luga di buska solushon.”
Representante di gobièrnu di Kòrsou Marvelyne Wiels i di gobièrnu di Sint Maarten Josianne Fleming-Artsen (dr) – potret di archivo: John Samson
‘Alarmante’
Sint Maartenhuis na Den Haag severamente ta kritiká e ‘klasifikashon generalista’ di antiano i arubano den e resultadonan di investigashon. Si por ehèmpel ta trata spesífikamente di porsentahe pa isla i e kousanan, CBS no ta mustra sifra. Loke minister plenipotensiario Josiane Fleming-Artsen sa kasi sigur ta ku e kantidat di víktima bou di hende di Sint Maarten en realidat ta minimal. Sinembargo e sifranan di CBS ta ‘alarmante i masha desafortuná’.
Kas di Kòrsou ta preferá di no reakshoná riba kontenido. “Despues di studia e artíkulo ku a sali intensivamente lo tuma kontakto ku e diferente munisipionan” minister plenipotensiario Marvelyne Wiels ta laga sa. Kas di Aruba no a duna reakshon.
Maneho ku ta faya
Ku òf sin supsidia, e organisashonnan antiano ke sigui trata e problemanan. “Awendia polítikonan no ta skucha sufisientemente e señalnan urgente ku ta sali for di komunidat antiano”, Helberg ta splika. E ta haña remarkabel kon polítika na Hulanda ta trata ku alóktono i estadístika.
Presidente di OCaN Glenn Helberg – potrèt: John Samson
Den e añanan ku gobièrnu hulandes tabata duna supsidia 22 munisipio a kambia nan státùs pa Antillianengemeente. Ora gobièrnu a kanselá e maneho di grupo spesífiko den komunidat , huntu ku e plaka di supsidio e nòmber polítiko Antillianengemeente tambe a disparsé. “E evaluashon di e areglonan di maneho a mustra ku e proyektonan di profeshonalnan antiano ku tabata trata e kousanan, tabatin éksito. Pakiko no ta usa e ‘lessons learned’ strukturalmente mas?”, Helberg ta puntra.
E minister plenipotensiario di Sint Maarten tambe ta puntra su mes awor ki intenshon gobièrnu hulandes tin. “Un investigashon spesífiko asina mester tabatin motibu. Tambe si bo mira ku un otro konklushon ta bisa ku e sifra di asesinato a baha na Hulanda”, e ta bisa. E tambe ta haña lástima ku Den Haag a stòp ku un maneho spesífikamente dirigí na e ‘problemasia di antiano’, bai un maneho mas general. Fleming-Artsen ta preferá di mira ku konhuntamente lo trata kriminalidat bou di hulandesnan di desendensia antiano òf arubano atrobe. Kuminsamentu disèptèmber Sint Maartenhuis tin un deliberashon ku munisipio di Rotterdam, tokante nan kompatriotanan den e munisipio ei.
Diálogo
Vereniging Antilliaans Netwerk ta spera ku rápidamente lo bini mas atenshon pa agreshon i kriminalidat bou di hóbennan hulandes karibense. Riba 17 di sèptèmber nan ta organisá un diálogo na Amsterdam huntu ku outor i krítiko Jopi Hart, kaminda sientífikonan i trahadó sosial huntu ku e komunidat antiano i arubano lo buska solushonnan.
Outor John Samson