Rapper Tmanjam – potrèt : Janita Monna
KRALENDIJK – E ta gosa ora e por haña un rima tripel, Tmanjam ta bisa. E ta saka un pida papel for di su saku ku un teksto kòrtiku. “Wak, aki ‘ban lora’ ta rima ku ‘Pandora’.” Ta un komienso pa un rèp. El a kaba di skibié. Un ‘beat’ i e palabranan a sali di mes. Tmanjam ta rèper. E ta skibi na papiamentu. “Mi sa skibi na hulandes tambe òf na ingles, pero na papiamentu mi por ekspresá mi mes mas mihó.
Idioma ta para sentral otro siman ora selebrá dia di Boneiru. Bou di e lema ‘Papiamentu nos identidat’ gobièrnu lokal, ku ta organisá e dia, ke pidi atenshon èkstra pa e idioma ku ta papia na Boneiru, Kòrsou i Aruba.
Mensahe
Tmanjam (35) ta skibi tokante tur kos. E por rabia pa situashonnan deplorabel riba su isla: “ ‘Mi pueblo ta cry’, mi a yega di skibi.” Pero e ta laga su rabia bai lihé atrobe. “Mi letranan ta tokante bida, tokante amor: ku e loke ku mi a kaba di skibi mi ke bisa ku un hòmber no mester di plaka nesesariamente pa por duna amor. Mi ta haña ku un rèp mester tin un mensahe.”
Tmanjam – den bida diario Juamar Nicolaas – ta skibi tur dia, tekstonan pa su mes i pa otronan. “Traha ku palabra, buska rima, ta un tipo di meditashon. Via e skibimentu mi ta deskubrí kos nobo den e lenga.”
Sinaida Janga ta kordinado di e programa ‘Arte di palabra’, un kompetishon di deklamashon pa mucha di Kòrsou, Aruba i Boneiru. Pa añanan kaba e ta guia hóben entre diesdos i diesshete aña ku skibimentu di poema i kuenta. “Hóbennan djawó ta skibi papiamentu mihó ku ántes. Bo ta ripará ku nan a siña na skol. Pero tambe nan ta usa idioma na nan manera. Ku ekspreshon nobo. ‘M’appbo’ (mi ta app bo) ta un ehèmpel.”
Amor pa isla
Mucha ta skibi tokante di bida, nan ambiente, kiko ta hasi doló. “Den mayoria di e tekstonan tin hopi amor pa nan isla. Nos ta skibi kuenta i poema pa mantené e kultura i e idioma bibu.” Segun Janga tin hopi talento na Boneiru. “Pero tin be e hóbennan ta poko tímido. Ta mi tarea pa pèrkurá pa nan talento sali.”
Sendion Balentin – potrèt: Janita Monna
Un di e talentonan ta Sendion Balentin (13). Si tin un konkurso di skibimentu na Boneiru, t’e ta gana. Esaki a kuminsá for di tempu ku e tabatin shete aña. El a gana un premio ku un kuenta kòrtiku tokante e morkoi chikí Tonki ku no ker a sali for di su webu. Poko dia ei el a sali promé den e konkurso di kantika ‘Kanta nos Boneiru’. E ta kanta algun frase: ‘Kanta bo kansion, bo tin libertat di ekspreshon’. El a skibi e teksto huntu ku Wesley Sint Jago, kaminda el a sigui workshop tokante skibimentu di kantika. “Mi a siña hopi tokante di rima, i kon un teksto ta kore dushi.”
Mésun edat
Sendion ta kanta dia 6 di sèptèmber riba Dia di Boneiru. P’e skibimentu ta un manera tambe pa desaroyá kultura di e isla. E ta preferá skibi pa esnan ku tin mésun edat kuné. “Nan ta komprondé mi mas miho.” E aña aki mes e ke skibi un kontinuashon di e kuenta tokante e morkoi Tonki.
Outor Janita Monna