Ben Whiteman ta papia ku prensa despues ku el a huramentá komo promé minister nobo di Kòrsou | potrèt: Dick Drayer
WILLEMSTAD – Bernard Denzil Whiteman ta promé minister nobo di Kòrsou. E médiko di 61 aña di edat ta tuma ofer di su kópartidario di Pueblo Soberano Ivar Asjes, ku djaluna anochi a entregá su retiro serka gobernador Lucille George-Wout.
Asjes ku a bira promé minister na aña 2013 despues di e asesinato di Helmin Wiels, djarason den un rueda di prensa spesial lo duna kuenta i rason, pero riba trapinan di Palasio di Gobernador el a bisa kaba ku e no tin sosten mas di su partido.
Ivar Asjes i Ben Whiteman ta papia
Basta tempu kaba e relashon entre e partido i e promé minister no ta bon, i ta reproch’é di tin kièr. No opstante un rapòrt devastador di Defensor di Pueblo, Asjes tabata keda defendé su minister plenipotensiario na Den Haag Marvelyne Wiels. Ora su partido a sostené un moshon pa baha Wiels, Asjes no ker a ehekutá esaki.
Ben Whiteman lo kontestá pregunta mas despues, pero el a bisa si ku ta duel e ku kos a bai asina i ku e lo keda promé minister tres luna so. Tanten su partido por buska un promé minister adekuá i proponé e persona aki pa un screening di seguridat. E ora ei Whiteman lo bolbe bèk na su posishon aktual di Minister di Salubridat Públiko, Medio Ambiente i Naturalesa.
Outor Dick Drayer