DEN HAAG – Arkefly no tin pèrmit pa bula for di Eindhoven pa Aruba i Kòrsou. Buelo ku un riesgo mas haltu di trafikashon di droga por bula solamente via Schiphol, pasobra e aeropuerto aki tin sufisiente medida di seguridat. E medida ta na vigor pa buelonan pa Aruba, Boneiru, Kòrsou, Sint Maarten, Sürnam i Venezuela. Asina minister Ard van der Steur (Seguridat i Hustisia) ta skibi Tweede Kamer.
Eindhoven Airport a reakshoná desapuntá pa e desishon. “For di hopi reakshon positivo nos a komprondé ku tin hopi petishon pa e buelonan aki den e region.”
Arkefly tambe ta desapuntá. Segun Hans van de Velde, managing director di e kompania di aviashon, e problema ta mas fèrfelu ainda komo ku hopi kliente a buk e buelo kaba. E kompania lo oumentá e kantidat di buelonan for di Schiphol pa Aruba i Kòrsou sí.
Kambio di lei
Van der Steur ke adaptá e Lei di Aviashon pa asina buelonan ku un riesgo oumentá por baha solamente na aeropuerto ku sufisiente fasilidat di kontrolá. Esaki ta nifiká ku e buelonan ku riesgo haltu por baha solamente na Schiphol i no na aeropuerto regional. Van der Steur ta spera di por trata e lei e aña aki mes den Tweede Kamer.
Na 2001 Schiphol a introdusí e kòntròlnan 100 porshento pa gara gulido di bolita. E tempu ei buelo interkontinental tabata pasa solamente via Schiphol. Esaki a kambia. “E maneho di gabinete entretantu a bira di laga buelo di vakashon sali mas tantu posibel for di aeropuertonan regional”, e ministerio di Seguridat i Hustisia ta skibi. Pero segun e ministerio no ta e intenshon pa perhudiká e maneho aki.
Badabada
Anteriormente e aña aki tabatin badabada ora a resultá ku Arkefly ker a ofresé buelo via Eindhoven pa Aruba i Kòrsou. E amtenarnan di e tres ministerionan envolví ta kontra pa motibu di e medidanan di seguridat limitá na e aeropuerto di Eindhoven. Konseho munisipal di Eindhoven tampoko no ta masha entusiasmá.
Outor Pieter Hofmann