Minister di Finanzas Angel Bermudez | potrèt: Ariën Rasmijn
ORANJESTAD — Presupuesto di pais Aruba pa 2016 lo wordo no wordo entrega aworaki. Esaki minister di Finanzas Angel bermudez ta duna di conoce na Ret Karibense. E plan ta pa keda cla cu e presupuesto prome cu fin di september, pa logra trata y aprobe no mas laat cu november.
Anteriormente e idea tabata pa entrega dos presupuesto, un pa 2016 y un pa 2017, na parlamento prome cu awe dia 1 di september. Riba conseho di Caft a dicidi pa entrega e presupuestonan separadamente.
Ariën Rasmijn combersando presidente di parlamento Lopez-Tromp y minister Bermudez
Hecho ta cu te aworaki nunca a logra entrega un presupuesto na ora desde cu Aruba a haya su Status Aparte. Presupuesto di 2015 por ehempel, a wordo aproba na mei di e aña aki. Pero na diferente ocasion Minister Bermudez a duna di conoce cu su proposito tabata pa logra e deadline aki.
Presidente di Parlamento Lopez-Tromp ayera ainda tabata considera e posibilidad cu e presupuesto lo wordo entrega na ora. Siman pasa el a manda un carta pa minister Bermudez, recordando e riba e deadline. Poco dia pasa el a haya di compronde for di e minister cu lo tabata trahando duro pa keda cla. Lopez-Tromp ta indica si cu e disturbionan na parlamento siman pasa a causa cu cierto reunionnan riba e presupuesto mester a wordo cancela. Pero no obstante di esaki, presidente di parlamento ta haya cu e presupuesto lo mester drenta e siman aki ainda.
Bermudez di su banda ta bisa cu e ultimo version di e concepto pa e presupuesto di 2016 lo mester wordo entrega na su persona e siman aki. A dicidi, por cierto tambe riba sugerencia di Caft, pa no entrega dos presupuesto. Segun minister Bermudez no por traha un presupuesto pa 2017 cu ta realistico ainda. Caft lo a conseha su persona pa enfoca riba finalisacion di e presupuesto pa 2016.
Autor Ariën Rasmijn