Willem Cicilia, bosero di e pashèntnan ku a sufri daño – | potrèt: Janita Monna
KRALENDIJK – Ku un tiki esfuerso Willem Cicilia ta lanta. E ta kana bai e kashi saka un saku di plèstik. “Esaki nan a saka for di mi lomba”, e ta bisa. E ta sakudí e saku laga e kontenido sali riba mesa. Skruf i bout asina grandi. “I no tabata nesesario niun ora.”
Na 2012 Cicilia a kuminsá sufri keho di lomba. E spesialista na Boneiru a mand’é Colombia, pa klínika Pablo Tobon Uribe na Medellin. “Dia 1 di febrüari 2013 a operá mi. Nan a hinka ocho bout i skruf i un asina yamá H-brùg.”
Skeins
Pero e no a sinti mihó. Un di e skrufnan tabata primi riba e nervionan. Bèk na Boneiru e dolo a sigui bira mas pió. El a haña terapia, pero e tabata move ku difikultat. Na aprel di e aña ei a bolbe oper’é. “A saka e bout ku tabata primi e nèrvionan, pero e ora ei henter e konstrukshon di mi lomba abou a bin para skeins.”
Cicilia no ta e úniko ku despues di un operashon di lomba den klínika Pablo Tobon Uribe a kai di panchi den kandela. E ta bosero di un grupo di 23 pashènt, di kua algun di nan ta mas mal pará kuné.
‘Desaster’
Inspekshon di salubridat a investigá e prosedura rònt di mandamentu pa Colombia. E rapòrt ku a sali na febrüari di e aña aki ta papia di un ‘desaster’. Cicilia: “Ora ku a bin sali ku mas hende tabatin keho despues di un operashon nan Medellin, Fundashon Mariadal a disidí di buska un spesialista na Hulanda pa saminá e pashèntnan. Esaki a establesé ku un gran kantidat di e perhudikadonan mester a haña un operashon di mehoransa na Hulanda. Ami tabata un di nan.”
No solamente a pone e skruf- i boutnan malu pero durante di e operashon un mikrobio a drenta su kurpa. “Bo sa kuantu kos di pasa doló i antibiotika mi a guli e aña ku a pasa aki? E ta mustra un potrèt ku un kareda masha largu di kaha di remedi. “Ta te ora ku a operá mi pa di kuater be na mei, na Aruba, mi no tabatin doló mas. Pero mi ta steif si.”
E rapòrt di inspekshon ta pinta un imágen deshonrá di ‘intervenshon no nesesario, mal indiká, kompliká i asta mal hasí’, di pashènt ku no tabata haña ku nan neurólogo tabata tuma nan na serio. Entretantu e mandamentunan pa Medellin a para. A duna e siruhano responsabel na Colombia su retiro. Pero e sufrimentu di e hendenan ku a haña nan trato ei no a pasa ku esaki.
Sufrimentu
For di e rapòrt ku e grupo di trabou Sosten a skibi bou di òrdu di e Ofisina di Seguro Médiko i Fundashon Mariadal, ta sali kon grandi e konsekuenshanan ta pa hopi hende. Tin di nan a keda desabilitá permanentemente, tin di nan a bira dependiente di ayudo di famia, tin daño síkiko, i algun di nan a pèrdè nan trabou pasobra nan tabata malu asina largu. “E manera ku a konfrontá algun pashènt ku nan retiro durante nan AO hopi bia tabata tiki empátiko.”
Cicilia ta konsiderá ku e mes tabatin sueltu den e aspekto aki. E tabatin un trabou na gobièrnu. “Mi a keda AO dos aña. Awe mi a bai traha pa promé biaha atrobe.” Su doño di trabou ta fleksibel, dependiendo di kon e ta sinti su mes e por bin traha kuater, seis òf ocho ora pa dia.
E pashèntnan perhudiká, pa medio di un abogado di daño personal, ke kuminsá un prosedura kontra e klínika na Medellin. Cicilia: “Mi ta spera riba un bon resultado, espesialmente pa esnan ku a pèrdè nan trabou.” Gobièrnu bonerianu a primintí di investigá den ki medida e pashèntnan di lomba afektá por kleim asistensia hurídiko.
Outor Janita Monna