Konsumidónan konfrontando inkumbiniensia ora di paga resibu di Aqualectra – Pòtrèt José Manuel Dias
WILLEMSTAD – For di promé di Yüni último pa motibunan di seguridat e kompania di utilidat Aqualectra no ta aseptando pago kèsh mas na su ofisinanan. Segun abogado Bertie Braam pa lei esaki no tin mag pa motibu ku florin antiano ta un medio legal di pago. “Tanten ku un kliente paga su kuenta na florin, Aqualectra ta obligá di aseptá sèn kèsh”, Braam ta enfatisá.
E konosido abogado ta sigui bisa ku Aqualectra no solamente ta aktuando kontra di lei pero konsientemente ta hasiendo mal uso di su posishon di monopolio pasobra e sa ku e konsumidó no tin niun otro opshon. E medida aki ta na desbentaha di e interesnan di e konsumidó prinsipalmente esnan di edat avansá ku semper a kustumbrá di paga nan resibu di awa i koriente kèsh na ofisina di Aqualectra.
Un reportahe di José Manuel Dias
Den kaso ku Aqualectra sigui nenga pago kèsh e úniko posibilidat di defensa ku a keda e konsumidó ta pa sea depositá e sèn di pago na Griffie i warda riba un reakshon di parti di Aqualectra òf kuminsá un kaso den korte kontra di e kompania di utilidat aki. Pero e último aki abogado Braam ta mir’é ménos probabel mirando e gastunan di abogado envolví.
Paso hurídiko
Entretantu Fundashon pa Konsumidó ku ta e organisashon ku ta sali na defensa di derechinan di konsumidó ta menasá di kuminsá un kaso den korte pa obligá Aqualectra pa drai bèk su desishon i kuminsá aseptá pago kèsh atrobe. Segun e kolaboradó hurídiko Andrea Geerlof, te ku aworakí e kòmbersashonnan ku Fundashon pa Konsumidó a hiba ku Aqualectra no a duna e resultadonan deseá i a yega e ora pa tuma pasonan hurídiko.
Bon fundá
Di su banda direktor interino di Aqualectra Darick Jonis ta refutá e ponensia di abogado Braam i ta alegá ku e medida ku a tuma pa stòp di aseptá sèn kèsh ta hurídikamente bon fundá . “No ta sèn kèsh so ta un medio legal di pago, tin mas medio legal ku bo por paga kuné”. Ademas e klientenan ku ke sigui paga kèsh por hasi esaki pafó di Aqualectra na mas di shen diferente punto di pago rònt Kòrsou, Jonis a reakshoná.
Jonis a splika ku e meta prinsipal pa kual a disidí di eliminá transakshonnan kèsh ta pa garantisá seguridat bou di e empleadonan i e propio klientenan i tambe eliminá transakshonnan ilegal di plaka. Banda di esaki mester mira e desishon aki den kuadro di desaroyonan mundial kaminda transakshonnan digital mas i mas ta birando e fundeshi pa hasi negoshi rònt mundu.
Pa abogado Braam e punto sentral ta keda e loke lei ta preskribí tokante medio legal di pago. E puntonan di pago ku Aqualectra ta bisa ku konsumidónan por hasi uso di dje no ta un argumento fuerte i Braam no ta kere ku un wes lo honra un argumento asina.
Outor José Manuel Dias