Junior Tecla i Wyclef Jean – potrèt: Shadiah Elhage
WILLEMSTAD – E fin di siman tras di lomba tabata dominá pa e tremendo ambiente patrosiná pa Curaçao North Sea Jazz Festival. E di seis edishon di e festival atrobe a proba di ta un evento di tanda ku ketu bai ta markando pauta internashonalmente. E aña akí, e presentashon mas energétiko di e festival tabata indudablemente esun di Wyclef Jean. Tambe Wyclef a duna un presentashon úniko den e bario di Oranjestraat na e WIFI’ing Park kreá pa fundashon Turtuga.
E famoso kompositor i kantante haitiano ku a bende miónes di albùm durante su ilustro karera ku Fugees i tambe komo solista, alabes a kolaborá ku artistanan renombra manera Shakira, Bono i Avicii. Apesar di tur su fama, Wyclef no a pèrdè e fanatikada fo’i bista, i ta tuma tempu pa konosé e pueblo ku semper a sostené.
Djasabra ultimo a toka turno di Oranjestraat, un di e barionan mas bieu di Kòrsou, unda In Ya Face Entertainment i Fundashon Turtuga a invita un grupito modera di muchanan di bario i nan mayornan i demas fanatikada, pa bini huntu i gosa di un presentashon inesperá.
Wyclef yegá riba un bròmer, pa asina e por a mira mas tantu posibel di nos isla. “Ami ta hòmber di pueblo, i mi stima hende, i no ta tur hende por paga un karchi pa wak mi presentashon, p’esei mi ta tuma mi tempu pa mi konosé e pueblo”, ela splika. Wyclef tabata espesialmente interesa over di e meta di e WIFI’ing Park, i kon esaki ke trese e habitantenan di bario huntu pa asina e interkambio sano di idea tuma lugá. Tabatin algun paisano haitiano presente, kende ela duna un serenada conmovedor i a tuma tempu pa saka potrèt ku nan.
Potrèt: Shadiah Elhage
Durante di su presentashon Wyclef a konta diferente anékdota di su bida personal, manera kon ela lanta den e bario patras di Croix-des-Bouquets na Haiti, bou di sirkunstansianan masha humilde. “Mi ta konta mi yu muhé ku mi tabata bai skol riba buriku, loke e no ta kere, pero bo por imagina bo ku ora m’a muda pa New York na edat di 10 aña, esaki tabata un shòk inmenso”, ela kompartí.
Tambe ela papia primintí di pronto bini ku material nobo i ta kolaborando ku varios artista di renombre. Despues ela duna un presentashon gratis na tur presente, kende por a gosa di varios hit manera ‘Gone till November’ i ‘Guantanamera’. Promé ku Wyclef a bai fo’i Oranjestraat ela sòru di saka potrèt ku tur hende i a desplegá un pasenshi enorme pa tur presente.
Su presentashon durante festival tabata unu energétiko i e públiko presente no a para ketu. A reina un atmosfera eufóriko unda un i tur a gosa un bol, ya ku e enigmátiko artista ta konosí pa su presentashon inolvidabel. “Bo duna e públiko tur loke bo tin, nan ta duna bo nan kurason bèk i Kòrsou sigur tin un lugá spesial den mi kurason”, e Wyclef a konkluí. “Lo mi bin bèk sigur.”
Outor Deya Mensche