Renée Gielen (man robes) ku Alvin ku semper a resistí e preshon di grupo | Potrèt: Dick Drayer
WILLEMSTAD – “Mi amigunan no ta mi amigu. Nan ta usa droga, tira atrako. Mayoria di nan ta será. Pero ami semper a bisa nò.” Alvin a lanta den Souax, un hóben positivo. E ta un di e hopi hóbennan ku ta partisipá na e dokumentario Nos hóbennan… nos futuro di produktor Renee Gielen.
E sine ta mustra ku Alvin ta un eksepshon. Bida a bai su amigunan mas malu. Nan ta den e prizòn ántes yamá Bon Futuro na Koraal Specht. Gielen ta bishitá nan i ta duna nan palabra. I nan víktimanan tambe. Den 50 minüt ta presentá un imagen profundo di e problema di kriminalidat hubenil na Kòrsou.
Segun ousiliante di kriminalidat Alex Wallé di fundashon Yave por solushoná e problema. “E koperashon den e área di prevenshon di kriminalidat entre Ministerio Públiko i e instanshanan di ayudo ta birando mas i mas mihó. Esaki ta basta úniko.”
Segun Wallé prevenshon ta primariamente un tarea di mayornan i enseñansa. Gobièrnu mester fasilitá. “Kriminalidat hubenil ta universal. Pero loke na Kòrsou ta hasi e problema mas grandi ta e falta di enseñansa na midí pa e grupo di hóben ku ta slep bai den direkshon di kriminalidat. Antes nos tabatin ambachtsschool i skol tékniko kaminda e hóbennan por a bai. Nan no t’éi mas.”
Material di lès
Siman ku a kaba a mustra e sine di Renée Gielen den teatro Luna Blou pa e ko-finansadónan, entre nan ministerio di Hustisia, partisipantenan i ekipo. Pronto lo anunsiá ki dia ta presentá e sine pa públiko. Di tur manera for di òktober e sine lo hasi un gira di tur skol di enseñansa di fundeshi. Alumnonan di gruponan 7 i 8 lo mira e sine i traha ku material di lès ku a desaroyá espesialmente p’esaki.
Outor Dick Drayer