Defensor di Pueblo Nashonal Reinier van Zutphen
DEN HAAG – Defensor di Pueblo Nashonal ta haña supsidia pa hasi su trabou na Hulanda karibense tambe. Minister Ronald Plasterk (PvdA) di Asuntunan Interno i Relashonnan den Reino (BZK) ta pone 250 mil euro disponibel.
Plasterk ta skibi Tweede Kamen ku ta trata di un kontribushon insidental. E aña aki i otro aña lo duna Defensor di Pueblo un kuart mion.
Sintimento miksto
Serka Defensor di Pueblo a risibí e promesa ku sintimento miksto. “A primintí plaka, esei ta positivo. Pero 250 mil euro no ta yega i ademas e no ta struktural. Esei ta trese insiguridat i masha difilultat den planeamentu”, bosero Erna van Eerden ta laga sa.
Defensor di Pueblo a pidi un kontribushon anual di entre 350 i 400 mil euro. Ku e plaka aki Defensor di pueblo ker a hasi mas investigashon, tene kombersashonnan ku organisashonnan di gobièrnu i duna workshop.
Ora di konsulta
Ademas e organisashon dos be pa aña ke tene ora di konsulta riba e islanan. Lo anunsiá oranan di konsulta ku un kampaña den media. Van Eerden: “Mirando e distansha, i e echo ku aya hende ta trese nan problemanan dilanti ku boka, ta masha importante pa ta bon visibel na islanan BES. E ora ei ta importante pa anunsia bo yegada delantá den media lokal”
Banda di esaki Defensor di Pueblo ke profeshonalisá e tim mas aleu. “Ta otro tipo di trabou ku na Hulanda oropeo. Mester konstruí un tim eksperto i kontinuamente profeshonalisá den área di idioma, konosementu hurídiko i training di media.”
Reakshon
Defensor di Pueblo Reinier van Zutphen riba término korto lo reakshoná ku un karta pa minister Ronald Plasterk. E mandatario no tabata alkansabel pa komentario.
Outor Pieter Hofmann