Rei Willem-Alexander
DEN HAAG – Rei Willem-Alexander awe durante di e diskurso di rei dia di apertura di aña parlamentario a tuma tempu un ratu kòrtiku pa reflehá riba e partinan karibense di Reino. El a papia tokante balornan komun den reino í tokante di integridat di gobièrnu.
Segun e kabes di estado toleransha, espasio pa e individuo, solidaridat i embolbimentu ta representá ‘un kapital sosial grandi’. “Nan ta pèrkura pa tur habitante di Reino por desaroyá den libertat, sa ku nan ta protehá i por sinti nan na kas. E manera di biba tesorá aki ta para sentral tambe den e selebrashon konhunto di 200 aña di Reino. Huntu ku e partinan karibense di Reino, Hulanda ta sigui traha na un bon futuro”, gobièrnu ta primintí via Willem Alexander.
Mantenshon di lei
Den su diskurso el a sigui mesora tokante integridat di gobièrnu. “Kaminda bahomundu i mundu drechi kuminsá brua den otro, lo manehá esaki. Lo bini plaka èkstra disponibel pa esaki.”
Ku esaki ta manera Willem-Alexander ta hasi un insinuashon riba loke tin papiá den Tweede Kamer tokante Sint Maarten i Kòrsou. Riba presupuesto di Relashonnan den Reino a reservá plaka èkstra pa mantenshon di lei (70.3 mion euro, e aña aki ainda tabata 62.6 mion euro). Entre otro Wardakosta (4.1 mion euro èkstra) i kapasidat di reshershi (3.6 mion euro èkstra) ta probecha di esaki.
Proyekto
E kuerponan públiko Boneiru, Saba i Sint Eustatius ta haña 5.1 mion euro pa promové e struktura sosial-ekonómiko i finansa di gobièrnu, e paisnan outónomo den Reino, Aruba, Kòrsou i Sint Maarten, ta risibí 9,5 mion euro.
Esaki ta pa kubri gastunan di proyekto di un di e paisnan pero tambe proyekto ku ta keda bini bèk manera Konsierto di Reino i e Konferensha di Reino. Pa 2015 te ku 2017 gobièrnu hulandes ta pone 3 mion euro pa reforsá e posishon di derecho di mucha den Hulanda Karibense. No a reservá plaka pa un Defensor di Pueblo Hubenil.
Sanashon di debe
Den e reformashonnan estatal na 2010 a palabrá ku Hulanda lo sana e debenan di e islanan. Otro aña gobièrnu na Den Haag lo hinka 150 mion euro den esaki. Den e dos añanan ku ta bini e suma aki lo oumentá bira 187 i 172 mion euro, na 2019 i 2020 Hulanda ta paga mas o menos 28 mion.
Fondo BES
E medionan disponibel di e fondo BES, ku gobièrnonan lokal di Hulanda karibense mester hasi nan tareanan kuné lo krem bai 33.4 mion. E aña aki ainda tabata 34 mion.
Outor Pieter Hofmann