Wes Peter van Schendel ta wak e puiru sushi bèrdè riba muraya di un kas na Marchena – potrèt: Anneke Polak
WILLEMSTAD – Wes Peter van Schendel no por muf durante su bishita na e bario Marchena. Aktivistanan di medio ambiente ta chang’é pa pleita nan kaso, amtenar di ministerio di Salubridat ke duna nan kontesta.
Na un distansha algun habitante ta para wak. Ku pasenshi nan ta warda te ora e wes tin tempu pa skucha nan relato. Pero ora porfin nan haña chèns di konta tokante e molèster di huma i stòf i keho di salú un snek ta drenta nan bos, nan wowo ta yena ku awa i un rabia ta surgi. “Bo sa kiko ta pone mi bira fèrdrit? Nan ta manda bo djaki p’aya i tene bo bobo. No ta bini un kontesta.”
Wes Van Schendel ta skucha e habitantenan. “Mi ke pa e kasonan aki haña atenshon èkstra. Nota e kehonan i wak kiko bo por hasi”, e ta bisa un amtenar di ministerio. Dòkter di kas Nana Rost van Tonningen ku a djoin e fundashon Clean Air Everywhere (Airu Limpi tur Kaminda, trad.), ta bisa ku e tin listanan largu di keho kla pa duna ministerio. “Asina e hendenan aki sali for di Kòrsou nan no tin keho mas.”
Oumento di keho
Poko poko e grupo di hende ta pasa den e bario. Na e ofisina di dòkter, Van Schendel ta para i mira e puiru sushi riba e porta. Dòkter Severing ta sali. “Mi t’aki for di 2006 i mi ta ekperienshá ku ta bini mas pashènt ku keho di pulmon, mucha hóben tambe ku nos mester duna kos pa hala rosea mihó. I hopi keho di dolo di kabes.”
Wes Peter van Schendel ta papia ku habitantenan di Marchena –potrèt: Anneke Polak
Na e stashon di midi den e bario emoshonnan ta subi i e wes ta purba tene tur hende trankil. “Pa motibu di bo tono agresivo mi ta inkliná di protehá e dama aki”, Van Schendel ta bisa abogado Sandra in ‘t Veld di Smoc, e otro fundashon ku a entamá un kaso sumario kontra gobièrnu. E ta pone man riba skouder di e amtenar i ta bira su lomba pa prensa. Djaki e deliberashon ta sigui sin hende kaweta. 19 di òktober ta sigui ku e kaso sumario.
Outor Anneke Polak