Eskritor Jopi Hart ta papia ku públiko na Amsterdam tokante kriminalidat i agresividat bou di hóben kurasoleño – potrèt: John Samson
AMSTERDAM – Kriminalidat i agresividat lo sigui oumentá, tantu na Kòrsou komo na Hulanda, si no intervení pronto. Asina eskritor Jopi Hart a atvertí durante un enkuentro tokante futuro di hubentut kurasoleño.
Segun Hart e problemasia ku ta kresiendo ta espesialmente falta di un edukashon negativo ku hopi mucha na Kòrsou ta haña. Banda di e situashon sosial-ekonómiko prekupante riba e isla, hopi dosente lo tin un ‘mindset’ ku ta daña mucha emoshonalmente na lugá di reforsá nan. E ekspertonan presente di Kòrsou i Hulanda ta rekonosé e kousanan aki.
“No ta sinku pa, sino sinku pasá di diesdos”, Hart ta bisa. Loke e ke men ta ku agresividat bou di hubentut kurasoleño ta asina grave, ku tin e peliger ku e lo bai forma parti di e komunidat i kultura di e isla. Hart a bula pa Hulanda pa papia tokante e eksperienshanan di den práktika ku el a inkorporá den su buki ‘Kruistocht’ (Kaminda di krus, trad.).
E sala yen di hende ta reakshoná di shòk ora Hart menta sifra di krímen i kantidat di ehèmpel di den práktika: kasi 40 porshento di e agresornan tin entre 12 pa 27 aña di edat. I kastigu den prizòn na Kòrsou ta mas bien un edukashon den kriminalidat, i nò un kastigu ku por ofresé e agresornan un perspektiva, segun Hart.
Trahadónan sosial di desendensia kurasoleño durante di e enkuentro a duna di konosé ku nan ke traha aktivamente pa hèndel agresividat i kriminalidat. Pero na mes momento e trahadónan aki ta indiká ku awor promé ta turno di gobièrnonan i munisipionan. Den Congrescentrum na Amsterdam entre otro tambe tabatin presente amtenar, eksperto i representante di polis hulandes.
No opstante su prekupashonnan grandi, Hart ta bisa ku e tin un tiki speransa tambe. Minister di Hustisia Nelson Navarro segun e, ta un di e ministernan despues di hopi tempu, ku ta komprondé e problemasia. Ta e intenshon pa pasa e mensahe di e públiko pa Navarro.
Outor John Samson