Joline for MillybyMichelle – potrèt fasilita pa Joline Braun
WILLEMSTAD – Tur febrüari i sèptèmber, New York, London, Milán i Paris ta keda inunda pa diseñadornan ku ta desplegá nan ultimo diseño di alta kostura, modela pa muhénan eksótiko ku ta bin di tur partí di mundu. Un generashon nobo di modelonan kurasoleño, manera Stephany Francisca i resientemente Joline Braun, tambe a estrena riba pasarelanan internashonal.
E luna di moda ta start na New York, dia 10 pa 17 di Sèptèmber, kontinuá na London entre 18 pa 22 di Sèptèmber, despues ta toka turno na Milán, kual ta kuminsá 23 pa 28 di Sèptèmber, i finalisá na Paris, kual ta kuminsá dia 29 di Sèptèmber pa 6 di òktober 2015.
Joline Braun, kende ta representá pa Premier Model Management i Supreme Management i ta bibando na New York, tabatin un aña alentador. Fo’i aña pasa ela modela durante ‘Fashion week’ den shownan di DKNY, rag & bone, Marc Jacobs, djis pa menshoná algun. E periodo akí, e no tabata den e pakete di show regular, pero pa febrüari 2016 si lo e modela regularmente. Si Joline a kana e show di MillybyMichelle durante ‘Fashion week’ na New York.
Kompliká
Kòrsou tin un relashon kompliká ku moda. Ambishon di modelahe ta keda mirá komo unu imaginario, i e industria di moda ta haña tiki sosten real pa desaroyá. Miki Eustachia, konosido coach di modelahe i propietaria di Emilka Model Management, kièr trese kambio den esei. Pa mas ku shete aña kaba, Miki ta organisá Curaçao Model Search i yuda lansa karera internashonal di vários modelo lokal manera Yu-Lian Dijkhoff, Shafni Vierbergen, Danielle Rosalia, i Mishanou Silvania. “Tin hopi talento lokal i nos ta resalta na New York i London, pero mester krese e plataforma i amplia e kontaktonan pa asina e modelonan lokal haña un chéns”, ela splika.
Stephany – potrèt fasilita pa Stephany Francisca
Stephany Francisca, promé finalista di Caribbean Next Top Model i empresario ku awó ta studiando na London, tambe por papia di e retonan ku un modelo lokal por enfrenta. Stephany a enamora di modelahe, pero a lucha hopi pasobra e no a keda firma nunka pa un agensia internashonal. Tòg ela logra kana durante diferente “Fashion week’ na New York i Paris, gran partí atribuí na su kurashi i pasobra ela drenta avion i paga fo’i su mes saku pa bai modela. “Mi ta atmití ku m’a kuminsá lat, pero fo’i un edat hóben ta un persona hopi ambisioso i analítiko. Pa un modelo ku a hasí kasi tur kos riba su mes, mi a gana bon sèn”, ela kontinuá.
“Un karera di modelahe ta kuminsá entre 15 pa 19 aña, pero hopi biaha ta nos mes kultura ta stroba nos di yegá mas leu. Pa motibu di enseñansa obligatorio, awó bo no por sali fo’i Kòrsou komo menor di edat”, ela splika. “Modelahe a duna mi e oportunidat di biaha, i e tempu ei skol tabata kooperá, pues mi tabata bai ‘Fashion week’ sigur kuater biaha pa aña”, ela kontinuá.
Potensial
“Kòrsou tin hopi potensial pasobra e ta un pais multikultural, pero e modelo kurasoleño mester tin ‘algu’, Stephany a splika. “Aktualmente, modelonan pretu mester ta super eksótiko i ‘straño’ pa nan resalta”, ela kontinuá. Europa tambe ta un alternativa, ya ku komo hulandes nos no tin e problema di visa, pero según Stephany, den mundu di modelahe europeo tin tiki opshon pa e modelo étniko. E plaka den modelahe ta den kampaña nan editorial i promoshon di produktonan di beyesa, ela splika. “Den eksterior bo ta kuminsá ripara ku modelonan miksto i mas kla ta ‘safe’ i ta ser konsiderá mas komersial”, ela konkluí.
Kòrsou tin un dia lo mira un supermodelo Kurasoleño? Según Stephany i Miki sí, pero pa esaki pasa, un plataforma solido mester keda establesé unda ta guia e prospektonan lokal. Tur dos ta kere ku un modelo lokal mester firma ku un agensia reputabel ku lo promové i habri porta p’e. Según Miki, ta parse ku ainda e modelo yu di Kòrsou no tin hamber sufisiente pa e logra internashonalmente i e rol di e mayor ta hopi krusial. “Ora unu logra, mayornan lo kuminsá kere den modelahe manera nan ta kere den baseball”, Stephany konkluí.
Outor Deya Mensche