Polítiko i komersiante den Amstelhotel ta mira bèk riba e koperashon for di 10-10-10 – potrèt: John Samson
AMSTERDAM – Reino ta manera un tipo di matrimonio fòrsá i e partnernan no ta konfia otro. Espesialmente e último parti di e ponensha aki ta un dolo grandi ku mester trata komo promé den e debate.
E debate di djabièrnè ta e parti final di e Mishon di Komersio ku den e dianan anterior a tene na Amsterdam pa Reino i Merka Latino. Un kos e polítikonan presente i e komersiantenan di tantu Hulanda komo e partinan karibense di Reino ta di akuerdo kuné: e partnernan den Reino apénas ta konfia otro i ta pa motibu di esaki ta surgi konflikto kada bia ku ta bai hopi leu.
E intenshon tabata espesialmente pa e biaha aki no papia tokante tur sorto di lei i areglo di disputa, sino tokante e manera ku e partnernan ta anda ku otro. Durante e debate a reflehá riba e diferenshanan kultural entre Hulanda i e islanan.
“Si bo bisa ‘mi ke gana konfiansa’e promé paso ta rekonosé ku e hendenan ei riba e isla por”, e komersiante Jack Schoonevelt ku ta traha hopi na Boneiru ta reakshoná. E ta dirigí palabra na e polítikonan i ámtenarnan di Den Haag. “Nan tin hopi boluntat, pero nan no ta haña un chèns. Si boso sigui na e manera ku kos ta bai awor seka kada proyekto di konstrukshon nobo, ta un kaso pèrdí.”
André Bosman (VVD) ta rekonosé ku na Hulanda ta hasi muchu tiki pa konosementu i posishon pa e islanan, pero na mes momentu ta kritiká e ‘demonisashon’ di polítiko hulandes riba e islanan. “Riba e islanan mi nòmber i di esnan ku ta anda ku mi ta igual na traidó di patria. Riba Facebook nan ta yama mi un rasista, miéntras ku esaki no ta bèrdè. Mi ta puntra mi mes: ta kiko prensa i polítika ta konta riba e islanan?”
Un paso atras
E solushon ta bini djis promé ku lunch; den futuro kombersá bon ku otro promé, saboriando algun serbes, i despues mésora trata e problemanan ku tin ku otro na un manera profeshonal. Tambe e polítikonan di e diferente partinan di Reino mester tene ménos distansha di otro: whatsapp ku otro i puntra otro kiko ta kiko, ta Bosman su konseho.
Awor ta warda un rapòrt importante ku un komishon di evaluashon ta saka na òktober tokante e konsekuenshanan di 10-10-10. Ku esaki Tweede Kamer lo kuminsa traha pa eventualmente revisa areglonan ku islanan BES.
Outor John Samson