Sidney Provance ku Joel da Silva Gois despues di kontrol na Goisco | Potrèt: Deya Mensche
WILLEMSTAD – E kontrolnan laboral ku sporádikamente ta keda hasí riba negoshinan riba nos isla, ta kousando hopi konsternashon. E propósito di e kontrol ta pa chek si e negoshi ta tene su mes na tur reglanan ku lei laboral ta stipulá.
Aktualmente, e tim di aproksimadamente trinta persona ta keda enkabesá pa Sidney Provance, kende tabata hefe di departamentu di labor i awó ta trahá komo kònsùltent pa gobièrnu. Según Joel da Silva Gois, propietario di e ‘megastore’ Goisco, e kontrolnan ta ilegal, ya ku sr. Provance no ta un ámtenar huramentá ku outoridat pa ehekutá e tipo di kontrolnan akí. Joel Gois ta asina indigna ku e kontrol riba su negoshi, ku e ta konsiderando pasonan legal kontra di Provance.
Problema ku e kontrol di Goisco
Ret Karibense tabata presente ora e tim di kontrol a bishitá Goisco, i na promé bista, nada tabata fo’i òrdu i tur kos a kana riba un manera masha ameno. Según Provance, ku eksepshon di dos trahadó haitiano ku mester a bai buska nan papelnan na kas, tur kos tabata na òrdu. Tambe mester komenda Goisco riba e echo ku su negoshi tin un kuerpo laboral balansa, esta 75% trahadó lokal i 25% ta estranhero. “A lográ esei ku hopi difikultat’, según Gois.
Tim multidisiplinario di kontrol den akshon na Goisco | Potrèt: Deya Mensche
Asta un potrèt hopi amikal Gois i Provance a saka na final di e kontrol. E problemanan a surgi ora, según Gois, Provance lo a hasí deklarashonnan difamatorio na radio kontra su persona despues di e kontrol. Según Provance, Gois su malkontentu ta sinta den e echo ku serka e gobièrnu anterior, kual Gois tabata un patrosinadó prominente, nunka e tipo di kontrolnan akí no a keda hasí. Tambe Gois ta kuestioná si Provance ta outorisá pa kondusi e tipo di kontrolnan akí komo kònsùltent, i ta kuestioná e valides di e akto. Tambe e ta tilda Provance di a drenta su establesimentu bou di preteksto falsu pa haña informashon delikado di su negoshi. Provance na su turno, no tabatin niun komentario riba e akusashonnan kontra di su persona i a dirigí tur pregunta na Minister Larmonie-Cecilia, kende a ninga den varios medionan di komunikashon di diskulpa pa e kontrol i a primintí asta di intensifiká nan.
Propósito di kontrol
Segun Provance e problemanan a kuminsá ku e introdukshon di e promé periodo di grasia na 2004 i introdukshon di Brooks Tower 1 i 2 na aña 2007. “No tabatin un plan, i a atmití hopi persona sin edukashon ku no ta kontribuí na e fondo di penshun di behes”, ela splika. Durante e kontrol, kual ta ankrá den e Ordenansa Nashonal di 23 di febrüari 1945 pa registro di trabou, e propósito ta pa kontrolá si e negoshi ta kumpliendo ku e leinan di labor. Spesífikamente ta chek si e negoshi ta registrá na kámara di komèrsio, tin pèrmit di establesimentu, ta inskribí na registro laboral i si e tin un number di crib.
Segun Provance, e tim di kontrol ke kontrolá tur negoshi, sin tratamentu preferensial. “Kòrsou tin un problema grandi ku eksploitashon di hende i hopi kos straño ta pasa”, e funshonario a kompartí. Gois di su partí ta aploudí e tipo di inisiativa i kontrol manera esun ku a tuma lugá, “pero nan mester pa tur negoshi, chikí i grandi”, ela insistí.
Lei 80/20
Pa basta tempu, gobièrnu di Kòrsou ke introdusí e lei di 80/20, pa kombatí e desempleo alarmante ku ta asotá nos komunidat. Ainda no a ratifiká e lei i ta di mira kon e implementashon di e lei lo bai en realidat. Según Gois, 80/20 ta un bon konsepto pero no lo funshoná den tur sektor. “80/20 no por keda introdusí sin lanta produktividat di e trahadó lokal”, Gois a splika. Según Provance, mester kultivá e hende pa asina por konstruí un nashon responsabel. Aktualmente departamentu di labor ta dunando hopi kurso, espesialmente na mamanan soltero, i ta trahando un base di dato laboral, Provance a deklará. “Nos ke kaba ku kompetensia desigual kontra e trahadó lokal”, ela finalisá.
Outor Deya Mensche