Mr. drs. Lydia Davelaar | Potrèt: Dick Drayer
WILLEMSTAD – E kantidat di kas bashí na Kòrsou a bira enorme. Kasi 8000 kas ta pará bashí. Esaki ta sigur 19 porshento di e kantidat di kas ku tin na Kòrsou.
Lydia Davelaar a gradua riba e tópiko aki na Universidat di Kòrsou i e wikènt aki a duna un presentashon di su resultadonan na hende interesá den bario di Muizenberg. El a haña sa ku den hopi kaso ta aspektonan kultural ta kousa di e kasnan bashí. Yu di Kòrsou tin un tabú di tèstamènt.
Kos ku no por papia
“Esaki ta bini for di tempu di sklabitut. Nos no gusta tene otro responsabel den asuntunan sensitivo. Den e kas di wela i tawela aktualmente tin un tanta i un tio ta biba, pero e kas ta propiedat di tur heredero. Pa mantené pas, nos no ta papia di esaki. Òf e kas ta keda bashi, pero niun hende den famia no tin kurashi pa kleim e kas”, asina Davelaar ta bisa.
Un hòmber mas bieu den e sala ta añadí: “Poko tempu ei m’a puntra mi ruman hòmber i ruman muhé, ku tur dos ta biba na Hulanda, si nos no mester regla algu rònt di Mamai su kas. E promé reakshon tabata: ta ki’ falt’e, ta malu e ta? Despues ata Mamai mes ta yama puntra mi si ta gana mi tin pa e muri. Mi a disidí di legumai.”
Derecho hereditario
Si no deskribí e biennan den un tèstamènt, esei ta nifiká ku na final ta lei ta dikta”, Davelaar ta bisa. For di 2012 e derecho hereditario a drenta na vigor. Esaki ta hasi posibel pa tuma kas bèk ora e doño fayesé i e famia no hasi nada ku e kas. Un eventual kumpradó mester haña un interesado ku ta firma un petishon pa esaki. “Esaki por ta un bisiña, ku tin molester di plaga of habitashon ilegal. Òf ku ta mira balor di su kas baha pasobra e kas band’é dje ta bai atras.”
Hende ku ta buska kas tambe ta haña chens di kumpra un kas bashi awor ku tin e lei nobo. Via un asina yamá likidadó, lo investigá si tin hende ku tin derechi di ta heredero i kiko ta nan parti di e herensia. Si esakinan no ta dispuesto na bende, por regla esaki serka wes, si tin un interesado, manera e bisiña of Monumentenzorg.
Kaha
Despues ta depositá e plaka den e kaha di konsignashon di Banko Sentral. “Durante binti aña herederonan por kleim e suma ku tin den kaha segun nan parti di e herensia. Despues e plaka ta pasa pa estado.”Ku e kasi 8000 kas ku ta pará bashí e tipo di proseduranan aki por tuma hopi tempu. “Pero nos mester kuminsá un kaminda”, Davelaar ta bisa.
Outor Dick Drayer
—–
Lydia Davelaar e aña aki a kaba su estudio di lei na Universidat di Kòrsou. Ku e tesina ‘De wettelijke vereffening volgens het nieuwe erfrecht: een oplossing voor onbewoonde huizen in Curaçao?’ (Likidashon legal segun e derechi nobo di herensia: un solushon pa kas pará bashí na Kòrsou?, trad.) el a gana e premio di tesina di Van Eps Kunneman Van Doorne 2015 pa e mihó tesina di master.
Gobernador Lucille George-Wout a risibí un ehemplar di e tesina serka Lydia Davelaar