Frank Martinus Arion ku su kasá Trudy na aprel 2014 | Potrèt: Dick Drayer
WILLEMSTAD – E nèstòr di literatura kurasoleño Frank Martinus Arion a bai sosegá awe meinta trempan. E eskritor a kue fama espesialmente ku su promé novela Dubbelspel, ku a sali na 1973. Pero na Kòrsou e ta konosí tambe komo poeta, luchadó pa idioma papiamentu den enseñansa i aktivista polítiko pa Pueblo Soberano bou di Helmin Wiels.
Trahadó di dokumentario Cindy Kerseborn na 2014 a portretá Arion den e pelíkula ‘Frank Martinus Arion, Yu di Kòrsou’. “Mi a siña konos’é komo un hòmber kaluroso, un muherero apsoluto, ku por a toka temanan ku tabata kibra tabú. Manera su poema De blanke negerin. Promé m’a pensa : ‘esei si ta barata’. Pero el a skibié djis despues di 30 di mei 1969 i, meskos ku hopi otro obra di su man, ku un punto di bista polítiko sosial.”
Segun Kerseborn Frank Martinus Arion tabata hopi mas ku solamente e novela Dubbelspel, ku el a kue fama mundial kuné. “Mi a puntra Frank ora mi tabata traha e dokumentario si el a skibi e novela ku el a debutá kuné komo e hòmber òf e muhé den Martinus? Na tur kos bo por a ripará ku tabata e muhé den dje.” “E ora ei bo a komprondé”, el a bisa Kerseborn.
Na 1992 Frank Martinus a bira Ridder in de Orde van Oranje Nassau. Un kondekorashon ku el a duna Estado Hulandes bèk na 2008. E eskritor tabata aktivo den Pueblo Soberano ku Helmin Wiels, un partido ku tabata kresiendo e tempu ei. Martinus Arion tabata haña e konekshon di e sanashon di debe na un struktura estatal nobo despresiabel i a akusá Hulanda di rekolonisashon di Antia.
Frank Martinus Arion a bai sosegá na edat di 78 aña.
Djadumingu 4 di òktober NTR ta ripití e dokumentario di 2014 di Cindy Kerseborn tokante Frank Martinus Arion kuat’or di atardi ora di Hulanda na NPO2. Despues por mira e dokumentario tambe via uitzending gemist.
Outor Dick Drayer